VA EFESO 6 - Embimbiliya - Bíblia Sagrada em Umbundu

¹ Ene amãla, pokoli kolonjali viene vu Kristu, omo oco ca sunguluka.

² Ocihandeleko catete ci kuete ohuminyo ceci, citi, Sumba so la nyõho,

³ okuti cosi ci kala ciwa love, kuenje oloneke viove palo posi vi lua.

⁴ Ene, a vaisia, ko ka wenguli onyeño yomãla vene, puãi va longisi loku va pindisa lovilongua via Ñala.

⁵ Ene akuenje, pokoli ku vacime cene va palo posi. Va sumbili loku limbuka ocikele cene. Va vumbi lutima wocili ndeci vu vumba Kristu.

⁶ Haku vumbako ño osimbu vo leti, ndava va sanjuisa omanu, puãi te oku tuwa ndakuenje va Kristu, loku linga ocipango ca Suku lutima wosi.

⁷ Vumbi lutima wa sunguluka ndava va vumba Ñala, omanu havoko.

⁸ Koleli okuti cosi ciwa omunu a linga o ci tambuila onima ku Ñala, ci kale upika, ci kale omamale.

⁹ Haico ene a va cime, lingi ndoco lakuenje vene. Imbipo ocituwa coku va lingisa usumba. Ivaluki okuti Cime cene, haeye Cime cakuenje vene, o kasi kilu, kuenje kokuaye ka kuli u wa velapo lu o sule.

¹⁰ Oku sulila ndinga siti, Kolisiko vu Ñala kuenda longusu yunene waye.

¹¹ Malehi ovimaleho viosi via Suku okuti vu tẽla oku tamalala latutu eliapu.

¹² Momo ka tu kasi loku yaka lositu kuenda osonde, te lovoviali, lovonene, lolombiali violuali viowelema ulo, lolohoka viovilelembia vĩvi viokilu.

¹³ Oco malehi ovimaleho viosi via Suku okuti veteke lĩvi vu tẽla oku yaka, okuti ndaño ovanyali va tamalala enene haimo vu yula.

¹⁴ Oco talami ño ngo. Ocili ci linge uvia woku itika volombunda viene. Esunga li linge ociteyuilo covonete.

¹⁵ Wali kolomãi eliangiliyo liondaka yiwa yombembua.

¹⁶ Ca piãla, walivo ociyepelo cekolelo momo lekolelo vu tẽla oku ima isongo viosi viondalu viukuevĩho.

¹⁷ Tambuli ongalau yepopelo, kuenda osipata ye Espiritu haiyo ondaka ya Suku.

¹⁸ Likutilili ve Espiritu olonjanja viosi. Sapuli ku Suku apingilo ene loku a felevela. Pandikisi locituwa caco loku likutililila olosandu viosi.

¹⁹ Lame le, liñutililivo okuti nyihiwa oku popia lutõi woku sapula lawo elumbu liondaka yiwa.

²⁰ Ame nda linga omunga yondaka yaco, kuenje cilo ndi yi kasilili kalienge. Liñutilili okuti ndi yi kunda lutõi ndeci nda sesamela oku yi kunda,

²¹ Manjange wa soliwa Tukiko, haeye ondingupange ya koleliwa vu Ñala, eye u sapuili cosi okuti vu kũlĩha ndeci ñasi leci ñasi loku linga.

²² Oco ndo tumila kokuene okuti vu kũlĩha ndomo tu kasi, kuenda okuti eye o vu kolisa vovitima.

²³ Ombembua yi kale la vamanji kuenda ocisola kumue lekolelo. Evi viosi vi tunda ku Suku Isietu kuenda ku Ñala Yesu Kristu.

²⁴ Ocali ci kale la vosi va sole Ñala yetu Yesu Kristu locisola ka ci fi.