VA EFESO 5 - Embimbiliya - Bíblia Sagrada em Umbundu

¹ Oco, setukuli Suku ndomãla va soliwa.

² Endaeli vocisola ndeci Kristu wa tu sola kuenje wa ci lekisa poku lieca kuenda oku lilumba ku Suku ndocilumba ci kuete elemba liwa.

³ Puãi, ene, ndaño oku vangula evi vi tiama kukahonga levĩho lovilivelo vĩvi, ko ka vi vanguli, momo havioko olosandu vi vangola.

⁴ Pokati kene ka pa ka kale akutisasõi, pamue olombangulo viesanda, pamue unjawe, omo ovina viaco ka vi kuatisa. Pa kale puãi ovitima vie yuka olopandu.

⁵ Kũlĩhi okuti lomue okahonga, pamue ukuevĩho, pamue ukuacipululu, okuti yu o fendela olosuku viñi, o kuete ocipiñalo cimue vusoma wa Kristu haiwo wa Suku.

⁶ Lomue ka ka vu liañe lolondaka viesanda, omo ovina ndovio ovio vi koka onyeño ya Suku yi wila omãla vakuesino.

⁷ Oco, ko ka linali lavo,

⁸ momo ale wa kaili owelema, cilo puãi vucinyi vu Ñala. Endaendi ndomãla vocinyi.

⁹ Momo epako liocinyi li sangiwa vovina viosi viwa, kuenda haivio viesunga haivio viocili.

¹⁰ Seteki oku kũlĩhisa ovina vi sanjuisa Ñala.

¹¹ Ko ka iñili vongongela yovilinga viowelema ka vimi apako, puãi vi situluli loku vi nena kutanya.

¹² Momo, ndaño oku vangula ovina va linga vuyombeki ku linga osõi.

¹³ Puãi eci cimue ci tuilua locinyi, oco ci tẽla oku muiwa, momo ocinyi ci molehisa cosi.

¹⁴ Oco ca sonehiwila citi, Pasuka okuaku pekela. Pinduka kokufa, kuenje Kristu o ku iha ocinyi.

¹⁵ Oco endaendi lutate nda vakualondunge. Ko ka endaendi ndava va kamba olondunge.

¹⁶ Kolisiko oku yukisa oloneke viene leci cesunga lika, momo oloneke vilo via viha.

¹⁷ Oco ko ka lingi aveke, puãi limbuki ocipango ca Ñala.

¹⁸ Ko ka kolui lovinyu, momo oco ci koka oku nyõleha, puãi yuki Espiritu.

¹⁹ Livanguisi pokati lolosamo lovisungo viefendelo li Espiritu. Imbili Ñala ovisungo lovisikilo lutima wosi.

²⁰ Vonduko ya Ñala yetu Yesu Kristu, panduili Suku Tate ovina viosi oloneke viosi.

²¹ Omo vu sumbila Kristu, oco lipokoli pokati.

²² Akãi, pokoli ku vaveyene ndeci ku Ñala.

²³ Momo ulume eye utue wukãi ndeci Kristu eye utue wekongelo, hailio etimba liaye, kuenje Kristu haeye upopeli walio.

²⁴ Ndeci ekongelo li pokola ku Kristu haico ca sesamelavo akãi oku pokola ku vaveyavo kovina viosi.

²⁵ Ene alume, soli akãi vene ndeci Kristu a sola ekongelo, kuenje wa li liecela

²⁶ okuti o li kolisa poku li yelisa loku li sukula lovava loku tanga ondaka.

²⁷ O kolisa ekongelo liaye okuti li lekisua kokuaye lulamba, kuenje li lekisua tupu lia pua atime lanyõle okuti li kola hailio li lipua.

²⁸ Haico ca sesamela alume oku sola akãi vavo ndatimba avo muẽle. U o sole ukãi waye o lisole eye muẽle.

²⁹ Momo lomue wa la suvuka etimba liaye muẽle, puãi o li tekula loku li lava ndeci Kristu o lava ekongelo liaye.

³⁰ Momo tuvimatamata vietimba liaye.

³¹ Oco ulume a sia isiaye la inaye ha likakatela lukãi waye, kuenje kavali havo va linga umosi.

³² Elumbu eli linene, ame puãi ndi ci popela Kristu lekongelo liaye.

³³ Haimo lumue, ene vosi, omunu omunu a sole ukãi waye ndeci a lisole eye muẽle. Ukãi layevo a sumbile veyaye.