VA EFESO 4 - Embimbiliya - Bíblia Sagrada em Umbundu

¹ Oco, ame ndimandekua vu Kristu ndu peyi okuti okukala kuene ku sunguluka lesunga lina lia sesamela upange u kola wa kovongiwili.

² Liunjukili pokati locisola, lumbombe wosi, kuenda oku omboka, lepandi.

³ Likapeliko oku likuata omunga ye Espiritu poku pandikisa oku kala lombembua.

⁴ Kuli etimba limuamue, le Espiritu limuamue, ndeci wa kovongiwili lekovongo limuamue kelavoko limuamue.

⁵ Ñala umuamue, ekolelo limuamue, epapatiso limuamue,

⁶ Suku umuamue, haeye Isia ya vosi, o kasi kilu liomanu vosi, kuenda o kasi kumue la vosi, o kasivo vokati ka vosi.

⁷ Puãi ocali ca eciwa kokuetu omunu omunu ndoseteko yocali ca Kristu.

⁸ Oco ca popiwila citi, Poku londa wa ambata owiñi wolohute, kuenje wa eca olongavelo komanu.

⁹ Eci va popia vati, Wa londa, siti ca lomboloka okuti tete wa loka toke kosi yongongo?

¹⁰ U wa loka haeye u wa londa kilu liovailu osi. Wa ci lingila okuti o yukisa ovina viosi.

¹¹ Wa va kapa okuti vamue va linga ovapostolo, vamue ovaprofeto, vamue ovakundi vondaka yiwa, vamue ovangombo, vamue alongisi.

¹² Wa ci lingila oku kolisa olosandu viaye ha vi lingi upange woku longisa loku tunga etimba lia Kristu,

¹³ toke etu vosi tu pitila kongongela yekolelo, leyi yoku kũlĩha Mõla a Suku, kuenje toke tu linga omanu vendamba va soka loseteko yutunga wokuyuka kua Kristu.

¹⁴ Oco ka tu lingi vali omãla va punguaiwa lolofela viosi viokulongisa lokulunguka kuomanu, latutu avo oku wengula esanda.

¹⁵ Puãi, oku popia ocili locisola, kovina viosi tu kulili ku Kristu eye utue.

¹⁶ Eci etimba liosi li tokekisua loku sokekisua lasokoluilo alio, leci ovimatamata vialio vi lingila pamosi ovopange avio locisola, oco kokuaye ku tunda eci ci kulisa etimba loku li amisako locisola.

¹⁷ Cimue ndu sapuili longusu, kuenje vonduko ya Ñala ndi cimbila uvangi, ceci, siti, Ka ci tava vali ene oku lingainga nda vakualofeka vakuavo va kasi luveke wovovitima.

¹⁸ Olondunge viavo vi kasi vowelema. Omo ovitima viavo via siva, oco va kasilili lonumbi, kuenje okukala kuavo kua litepa lomuenyo wa Suku.

¹⁹ Va tĩlisa ovitima. Va lieca kupuepue. Va livela oku linga evĩho liosi.

²⁰ Ene puãi Kristu ka wo lilongisili ndoco,

²¹ nda wo yevi kuenda wo lilongisi ndeci a moleha ocili vu Yesu.

²² Nda wa luli omunu wale una wa tiama komuenyo wale, haiwo wa vĩha loloñeyi vieliaño,

²³ kuati ovitima viokaliye okuti vu linga omanu vokaliye.

²⁴ Wali omunu wokaliye una wa tungiwa lesetahãlo lia Suku lesunga kuenda oku kola.

²⁵ Oco oku popia uhembi ku imuhe. Omunu omunu a popie ocili lukuavo, momo tuvimatamata vietimba limuamue.

²⁶ Temi, puãi ko ka lingi ekandu. Ekumbi ka li ka iñile lokutema kuene.

²⁷ Ko ka eci evelo keliapu.

²⁸ U wa ivaile ka ka ive vali, puãi a linge upange wocili lovaka aye okuti o sanga coku kuatisa laco olosuke.

²⁹ Vovimela viene ka mu ka tunde ombangulo yĩvi, mu tunde puãi olondaka vi kuatisa, haivio via soka lotembo yaco, kuenje vi sumũluisa ava va vi yeva.

³⁰ Ko ka sumuisi Espiritu Sandu lia Suku. Eye muẽle ondimbukiso yo kapelui eteke lieyovo liene.

³¹ Ocikumbiti lonyeño lekaka kuenda onjuela lusokui locipombo, viosi vimbipo.

³² Liombokeli pokati loku lilinga ohenda loku liecela pokati, ndomo Suku a weceli vu Kristu.