VA EFESO 3 - Embimbiliya - Bíblia Sagrada em Umbundu

¹ Ame ndi Paulu ndo lingili ene wakualofeka omandekua ya Kristu.

² Ka ku pumbi okuti wa yevi ale ndomo ukalei wocali ca Suku wa nyihiwa okuti ndu ci muisi ene.

³ Ka ku pumbi okuti wa yevivo ndomo elumbu liaco lia situluiwila ame ndeci nda fetika ale oku soneha.

⁴ Eci vu tanga ukanda ulo vu limbuka ndomo ñasi lukũlĩhiso welumbu lia Kristu

⁵ Elumbu liaco ka lia situluiwile komãla vomanu vakuavitumbulukila vikuavo, ndeci koloneke vilo lia situluiwa le Espiritu kovapostolo va kola lo kovaprofeto.

⁶ Elumbu liaco lieli, omo ondaka yiwa yeya, oco cilo vakualofeka va lingavo vakapiñala vu Kristu Yesu, haivo ovimatamata vietimba liaco limuamue, kuenje ohuminyo lavovo ya va tukulavo.

⁷ Ame nda noliwa oku linga ulombololi wondaka yaco yiwa. Ñuete ocikundi coku yi lombolola ndeci ca soka locali ca Suku longusu yunene waye wa nyihiwa.

⁸ Ndaño ame sulepo pokati kolosandu viosi haimo ocali caco ca nyihiwa. Ca nyihiwila okuti ñundila vakualofeka ondaka yiwa yukuasi ka u tendiwa wa Kristu,

⁹ loku situluila omanu vosi ndomo mu kasi elumbu lina lia vundisua tunde nunde vu Suku Usovoli wovina viosi.

¹⁰ Elumbu liaco lia situluiwila okuti kaliye ekongelo lia Kristu li lekisa kovosoma lolombiali viovovailu olondunge vi likasi kasi via Suku.

¹¹ Eci oco ocipango ca Suku tunde ka ku ci, kuenje ca tẽlisua vu Ñala yetu Yesu Kristu.

¹² Omo tu kasi vu Kristu, tu kuete utõi kuenje tua kolela okuti tu tẽla oku pitila ku Suku.

¹³ Oco ndu vetiyi okuti ka vu kuata olukonyo omo ñasi loku u taleli ohali. Ohali yange ulamba wene.

¹⁴ Oco ñekama si likutilila ku Isia,

¹⁵ u apata osi o kilu la-a o posi o lukulula.

¹⁶ Ndi likutilila okuti, ndeci ca soka lukuasi wulamba waye, haico Suku Isietu o kolisi longusu ye Espiritu liaye vovitima viene.

¹⁷ Ndi likutililavo okuti, omo vu kasi lekolelo, oco Kristu o kala vovitima viene, lomo wa tuameli loku sevetiwa vocisola,

¹⁸ oco vu kuata unene woku kũlĩhila kumue lolosandu upati lusovi lokulepa kilu lokulonga posi kuocisola caco.

¹⁹ Ndu likutilili okuti vu kũlĩhavo ocisola ca Kristu cina ca pitahãla ukũlĩhiso, okuti vu yukisua okuyuka kuosi kua Suku.

²⁰ Kaliye ku o tẽla oku talavaya lunene u kasi vokati ketu, loku linga eci ca piãla, okuti eci tu pinga, pamue eci tu sima, ci sule,

²¹ ku kale ulamba wovekongelo lu wovu Kristu Yesu toke kovitumbulukila vi enda ño-o hũ ka vi pui. Amene.