VA EFESO 2 - Embimbiliya - Bíblia Sagrada em Umbundu

¹ Kuenje ene wa fili lakandu kuenda lolohole

² vina wa enda endaili lavio eci wa kuami ovituwa violuali lulo loku pokola ku soma yolondele, ene muẽle Kristu o wihi vali omuenyo. Soma yolondele haeye eliapu, lopo o kasi loku linga upange waye vovitima via vakuesino.

³ Letuvo tua kaile vakuesino eci tua lingaile oloñeyi vietimba. Tua lingainga ocipango cetimba leci covisimilo viutima, okuti letuvo tua sesamelele onyeño ndomanu vakuavo.

⁴ Puãi, omo Suku ukuahenda ya lua wa tu sola ca lua,

⁵ ndaño tua file lakandu, oco wa tu iha omuenyo kumue la Kristu. Wa popelui locali.

⁶ Wa tu pinduila kumue la Kristu Yesu kuenje wa tu tumalisa kumue laye kilu.

⁷ Wa ci lingila okuti, koloneke viya, o tu lekisa ukuasi ko popiwa wocali caye lohenda yaye, eyi a tu lekisila vu Yesu Kristu.

⁸ Wa popelui ocali omo wa kaili lekolelo. Ka wa ci lingili ene muẽle puãi ca tunda ocali ku Suku.

⁹ Ka ceyilile ovilinga sanga umue o lipanda.

¹⁰ Etu tupange waye. Tua lulikiwila vu Kristu Yesu, ha tu lingi ovilinga viesunga, vina Suku a tu pangela tunde nunde.

¹¹ Oco, ene a vakualofeka, ka wa seviwili evamba lietimba, haene wa tukuiwi oviyamba lava va lipanda vati, Tua kuevamba,— ndaño evamba liavo lietimba lia lingiwa lovaka,

¹² ene ivaluki okuti, kotembo yaco ka wa kaili la Kristu, wa kaili kupãla longongela ya va Isareli, ka wa kũlĩhili ovisila viohuminyo, ka wa kaili lelavoko, kuenje, omo wa kaili voluali, ka wa kũlĩhili Suku.

¹³ Cilo puãi, omo vu kasi vu Kristu Yesu, oco ene wa kaili kupãla weyi ocipepi, omo osonde ya Kristu yo pesekeli.

¹⁴ Momo eye ombembua yetu. Apata etu avali wa a linga limuamue. Wa teya ocimano cuyaki ca kaile pokati ketu.

¹⁵ Wa ci linga loku kala pokati ketu vetimba loku imula ocikundi covihandeleko lovihõlo. Wa ci imuila okuti apata avali a lingila epata limosi liokaliye vu Kristu. Poku ci linga wa nena ombembua.

¹⁶ Wa ci imuilavo okuti lekulusu liaye, kavali ketu o tu inalisa la Suku ha tu kala ndetimba limosi, okuti uyaki wimuha.

¹⁷ Oco weya, kuenje wo kundili vosi ondaka yombembua, ndaño ene wa kaili kupãla, ndaño ene wa kaili ocipepi.

¹⁸ Omo tu kasi la Kristu oco kavali ketu tu tẽla oku pitila ku Isia v'Espiritu limuamue.

¹⁹ Oco, hawakombeko vali pamue vuvingendeleyi, puãi wakuafeka yimuamue lolosandu, kuenda wakuepata lia Suku.

²⁰ Ociseveto cene ovapostolo lovaprofeto, ewe liaco lievindi Kristu Yesu.

²¹ Onjo yaco yosi ya litokeka vu Kristu, yi kula, kuenje yi lingila vu Ñala onembele yi kola.

²² Omo vu kasi vu Kristu, oco lenevo wa tungiwivo vonembele yaco omu Suku a kala kala l'Espiritu.