VA EFESO 1 - Embimbiliya - Bíblia Sagrada em Umbundu

¹ Ame ndi Paulu haime ndupostolo wa Kristu Yesu, momo oco ca panga Suku, Sonehela olosandu vi kasi ke Efeso, haivio vakuekolelo vocili vu Kristu Yesu.

² Ocali lombembua yi tunda ku Suku Isietu, kuenda ku Ñala yetu Yesu Kristu, yi kale lene.

³ Suku, Isia ya Ñala yetu Yesu Kristu, a sivayiwe! Wa tu sumũlũisila vu Kristu lasumũlũho osi Espiritu a tunda kilu.

⁴ Osimbu oluali ka lua sevetiwile handi wa tu nola okuti vu Kristu tu kola kuenda tu lipua evelo kovaso aye.

⁵ Suku wa tu nola locisola caye kuenje wa panga ale okuti tu linga omãla vaye la Mitakati Yesu Kristu.

⁶ Wa ci lingila okuti tu sivaya ulamba wocali caye ca lua, cina a tu ihila v'Omõlaye wa soliwa.

⁷ V'Omõlaye, okuti vosonde y'Omõlaye, omo tu kuetele eyovo longecelo yakandu. Via tunda kokulua kuocali caye,

⁸ cina a tu muisa lolondunge toke ca tu supokaila.

⁹ Wa tu lumbuluila elumbu liocipango caye ca sunguluka ndeci a panga ale.

¹⁰ Ocipango caco caye ceci, Wa panga okuti, eci otembo yaco yiya, oco ovina viosi, okuti evi viokilu levi vioposi, vi kongeliwa kuenje vi lingiwa vu Kristu.

¹¹ Suku, una o suisapo ovina viosi ndeci ca soka locipango caye, eye wa panga okuti

¹² etu tua kolela tete Kristu, etu muẽle tua noliwa ale okuti tu kala vu Kristu, kuenje ulamba waye u sivayiwa lovimuenyo vietu.

¹³ Kuenda vali, ene wa yevi ale ondaka yocili haiyo ondaka yiwa yeyovo liene, haene eci wa kali vu Kristu wo koleli, ene wa kapiwi ondimbukiso y'Espiritu Sandu lia likuminyiwa.

¹⁴ Espiritu Sandu olio onjeke yocipiñalo cetu toke tu tambula ocipiñalo caco cosi, kuenje oco ulamba waye u sivayiwa.

¹⁵ Oco, omo nda yeva ndomo wa koleli ocili Ñala Yesu Kristu, lomo vu sole olosandu viosi,

¹⁶ oco si liweka oku u panduili loku wivaluki volohutililo viange.

¹⁷ Ndu likutilili okuti Suku ya Ñala yetu Yesu Kristu, haeye Isia yulamba, o wihi utima wolondunge lesituluko, una u tunda poku kũlĩha Suku

¹⁸ eci ovaso utima a patuluka. Ndu likutililivo okuti vu kũlĩha elavoko eye a panga oku u sumũlũisi lalio eci o kovongi, lukuasi wulamba wocipiñalo caye volosandu.

¹⁹ Ndu likutilili okuti vu kũlĩha unene wa piãla wolohõlo viaye vi kasi letu tuakuekolelo. Upange wolohõlo viaye via lua wa molehela pokati keci

²⁰ a lingilile vu Kristu poku u pindula kuava va fa loku u tumalisa kovailu kondio yaye.

²¹ Wo kapa kilu liuviali wosi, lomoko yosi, lunene wosi, lusoma wosi, londuko yosi, ndaño eyi ya tukuiwa ale otembo yilo, ndaño eyi yi laika oku tukuiwa volotembo viya.

²² Suku wa kapa ovina viosi vemehi liolomãi via Kristu, kuenje wo linga utue wovina viosi viekongelo.

²³ Ekongelo olio etimba lia Kristu, hailio eyuko liaye, kuenje Kristu o yukisa to ovina viosi.