UKUNDI 9 - Embimbiliya - Bíblia Sagrada em Umbundu

¹ Puãi cosi eci nda ci sokolola loku ci moñolola ndomo vakuesunga kuenda vakuevĩho kumosi lovilinga viavo, cosi ci kasi peka lia Suku; nda pa tunda ocisola, nda pa tunda esuvu, omunu ka ci; kokuavo cosi ci molẽha okuti esanda,

² omo efulilo liavo vosi limuamue, ci kale vakuesunga, ci kale vakuevĩho; ci kale ava vawa, ci kale ava vãvi, ci kale ava va yela, ci kale ava va vĩha, ci kale u o lumba lumba, ci kale u ka lumba lumba. Ndeci ci kala lukuesunga haico ci kala lukuakandu; u o lisila ocisila lu o yuvula oku lisila va lisoka.

³ Evĩho li sangiwa pokati kovina viosi vi lingilua vemi liekumbi lieli: omanu vosi efulilo liavo limosi. Kuenda vali ovitima viavo vie yuka evĩho, vovitima viavo muli uveke osimbu va kasi lomuenyo, noke va enda ko vakualufa.

⁴ Puãi u o tiamẽla kuava va kasi lomuenyo o kuete elavoko; momo ombua yi kasi lomuenyo ya velapo, ohosi ya fa yi sule.

⁵ Momo ava va kasi lomuenyo va kũlĩha okuti va laika oku fa, puãi ava va fa lacimue va kũlĩha, ndaño onima yimue ka va kuete vali, momo onjivaluko yavo ya nyolẽha.

⁶ Ocisola cavo lesuvu liavo lonya yavo cosi ca imũha ale, ka va kuete vali onepa yimue yovina vi lingilua vemehi liekumbi.

⁷ Kuende, ka lie okulia kuove lonjolela, kuende, ka nyue ovinyu viove lutima wa sanjuka; momo Suku wa sanjukila ale ovilinga viove.

⁸ Uwalo wove u yele ño kuenda kutue wove ka ku ka kambe kambe ulela.

⁹ Sanjukila omuenyo kumosi lukãi wove una o sole. Oloneke viosi sanjukila omuenyo wove wesanda ima a kuiha vemehi liekumbi, momo eyi oyo onima yove yomuenyo, haiyo onima yupange wove wa sakalala lawo vemehi liekumbi.

¹⁰ Cosi eka liove lia kuata ci linga longusu yove; momo vonjembo omo wenda ka muli upange, ndaño ovikuata, ndaño ukũlĩhiso, ndaño olondunge.

¹¹ Nda mõla vali okuti vemi liekumbi okuyula koku litunda ka ku kasi kukualupesi, kuenda okuyula vocilunga ka ku kasi kukualohõlo, ndaño okulia hakuvakualondungeko, ndaño ipako haviava va lungukako; ndaño omangu hayava va loñolõhãko, puãi cosi ciya ño, ci veta ño.

¹² Momo omunu ka kũlĩhĩle eteke liaye. Ndeci olosi vi kuatiwila vowanda ũvi, pamue olonjila vi kuatiwila vonjanjo, haico omãla vomanu va kuatiwa keteke lĩvi eci ci va kupukila ocipikipiki.

^13-14 Ocisetahãi cikuavo colondunge nda mõla vemehi liekumbi haico nda limbuka okuti cinene, ceci: kua kala imbo litito, alume va kalamo vañamiñami, kuenje osoma yimue yinene yeyako, ya li ñuala ocingonja, kuenje ya pongiya ovimaleho vioku li kuata.

¹⁵ Puãi vimbo mua sangiwa osuke ukualondunge, kuenje eye wa popela imbo liaco lolondunge viaye; haimo, lomue wa ivaluka osuke yaco.

¹⁶ Oco nda linga siti, Olondunge via velapo ongusu yi sule, ndaño olondunge viosuke via sepuiwa kuenda olondaka viayeka via taviwile.

¹⁷ Olondaka viavakualondunge via yeviwa levando via velapo, okuvilikiya kuosoma pokati kaveke ku sule.

¹⁸ Olondunge via velapo, ovimaleho viovita vi sule, puãi ondingekandu yimosi yi nyõla uwa wa lua.