UKUNDI 8 - Embimbiliya - Bíblia Sagrada em Umbundu

¹ Elie wa lisoka lukualondunge? Elie wa kũliha elomboluilo liocina cimue? Olondunge viomunu vi ninisa ocipala caye, lokukãla kuocipala caye ku pongoloka.

² Pokola kocihandeleko ca Soma, momo wa lisila ocisila ci kola.

³ Nda o tunda kovaso aye, ku ka tunde lonjanga, ku ka pandikise londaka ka ya sungulukile, momo eye o linga ndeci a panga.

⁴ Omo ondaka ya Soma yi kuete omoko, elie o popia laye hati, O linga nye?

⁵ U o pokola kocihandeleko ka tali ohali, kuenje vutima wukualondunge cosi ci lomboloka.

⁶ Momo ondaka yosi yi kuete otembo yayo lonimbu yayo, ndaño ohali yomunu yu vala.

⁷ Momo eci ciya eye ka ci omo elie u sapuila ndomo ci kala?

⁸ Lomue omunu o kasi lepondolo lioku pokuisa ofela pamue lomoko yoku tukula eteke liokufa. Ndaño kovita ka kuli oku eciwa, ndaño evĩho ka li popela ava va litumbika kokualio.

⁹ Cosi eci nda ci mõla osimbu nda sokolola evi vi lingilua vemehi liekumbi, omo omunu poku kangisa ukuavo o lilinga eye muẽle civi.

¹⁰ Yu nda mõla vakuevĩho va kendiwa. Osimbu va kala levĩho liavo va endaenda konembele yi kola, kuenje vakuimbo va va sivaya. Eci lacovo esanda.

¹¹ Omo eyambulo lia tukuiwila vekanga ka li lingiwa lombili oco ovitima viomãla vomanu vi kuata utoi woku linga cĩvi.

¹² Ndaño ondingekandu yi lueya ocita colonjanja kuenje omuenyo waye wamamako ño, haimo ndi ci okuti ava va sumba Suku va kala ciwa omo va kasi kovaso aye lesumbilo.

¹³ Puãi ka ci kala ciwa londingekandu, ndaño oloneke viayo ka vi lepi ndundembo, momo ka ya sumbile Suku.

¹⁴ Kuli esanda limue li lingilua kilu lieve, lieli: kuli vakuesunga va sanga eci ca sesamẽla vakuakandu, kuli vakuakandu va sanga eci ca sesamela vakuesunga. Nda linga siti, Eci lacovo esanda.

¹⁵ Oco nda sivaya esanju omo komunu vemi liekumbi ka kuli cimue ciwa te oku Ha loku nyua kuenda oku sanjuka; momo ovio vi kala laye vupange waye oloneke viomuenyo Suku a wiha vemehi liekumbi.

¹⁶ Eci nda likapela oku kũlĩha olondunge loku kũlĩhisa upange u lingilua kilu lieve okuti ovaso omunu ka a moli otulo ndaño utanya ndaño uteke,

¹⁷ oco nda limbuka upange wa Suku okuti omunu ka tẽla oku kũlĩhisa upange u lingiwa vemehi liekumbi. Ndaño omunu o sakalala oku u kũlihisa, haimo ko kũlihisa; ndaño umue ukualondunge a popia hati, Ndo kũlĩhisa, haimo ka tẽla oku u kũlĩhisa.