UKUNDI 7 - Embimbiliya - Bíblia Sagrada em Umbundu

¹ Onduko yiwa ya velapo, onguendu ya tĩla yi sule; eteke liokufa lia velapo, eteke lioku citiwa li sule.

² Ca velapo oku pasula konjo yokufa, oku pasula konjo yofesta ku sule, momo okufa oko esulilo liomanu vosi, kuenda ava va kasi lomuenyo va civaluka.

³ Okulila kua velapo, okuyola ku sule, momo okunyumãla kuocipala ku koka oku sanjuka kutima.

⁴ Utima wukualondunge u kasi vonjo yokufa, puãi utima weveke u kasi vonjo yonjolela.

⁵ Ca velapo komunu oku yeva okulemẽla kuavakualondunge, oku yeva ovisungo viaveke ku sule.

⁶ Momo ndeci okuyuela kuondalu yolosongo vemehi liombia, haico oku yola kueveke. Eci lacovo esanda.

⁷ Momo ocili okukangisua ku pongolola ukualondunge kuenje o linga eyui, ovitukiko vi nyõla olondunge.

⁸ Esulilo liocina cimue lia velapo, efetikilo liaco li sule; ava va kasi lutima wepandi ovo va velapo, ava va kuete utima woku lisola ovo va sule.

⁹ Ku ka teme lonjanga, momo okutema kua tunga volonulo viaveke.

¹⁰ Ku ka pule huti, Ci kasi ndati okuti oloneke viosiahũlu via velapo okuti oloneke vilo vi sule? Momo eci ku ci pula lolondunge.

¹¹ Olondunge kumue locipiñalo oco ciwa, haico esumũluho kuava va lete ekumbi.

¹² Momo ombindikiyo yolondunge ya soka lombindikiyo yolombongo. Okuvelapo kuolondunge kuoku: vi popela omuenyo wu o kasi lavio.

¹³ Sokolola upange wa Suku; elie o tẽla oku pengulula eci eye a pengisa?

¹⁴ Keteke lielau sanjuka, keteke liohali sokolola; Suku wa vi panga kavali kavio okuti omunu ka kũliha eci cu kuãi.

¹⁵ Vomuenyo wange wesanda nda mõla cosi; kuli ukuesunga o nyolẽhela vesunga liaye, kuli ukuevĩho loloneke viomuenyo waye vi lua levĩho liaye.

¹⁶ Ku ka linge esunga lia lua enene, pamue ku ka kale lolondunge via lua enene; o linyõlela nye?

¹⁷ Ku ka linge cĩvi calua enene, pamue ku ka linge uveke; nye o fila osimbu eteke liove ka lieyile?

¹⁸ Ciwa nda eci o ci kuata muẽle, kuenje cikuavo ku ceci; momo u o sumbila Suku o vi tẽla kavali kavio.

¹⁹ Olondunge vi kolisa ca velapo ukualondunge, ekui liolombiali vi kasi vimbo ci sule.

²⁰ Ocili ka kuli ukuesunga kilu lieve okuti o lingainga esunga kuenje ka lueya.

²¹ Ku ka yevelele kovina viosi vi popia popia omanu, sanga o yeva ukuenje wove o kasi oku ku siñala;

²² momo vutima wove muẽle wa ci kulĩha okuti olonjanja via lua lovevo wa siñala vakuẽle.

²³ Ovina evi viosi nda vi seteka lolondunge; nda linga siti, Ñala lolondunge, puãi via kala kupãla lame.

²⁴ Cosi cokilu lieve ci kasi kupãla kuenda ca longa ca lua; elie o tẽla oku ci moñolola?

²⁵ Nda panga muẽle oku kũliha loku moñolola loku vanjiliya olondunge, loku kũlĩhisa elomboluilo liovina ndomo vi kasi, kuenda oku kulihĩsa evĩho liuveke lesanda lina lia linga uyui.

²⁶ Yu nda sanga okuti eci ci lula ca piãla okuti okufa ku pepa, ceci: ukãi nda utima waye wa linga onjanjo pamue ulivi, lovaka aye a linga ovikolo; u wa sunguluka ku Suku u puluka, puãi ukuakandu o kuatiwa laye.

²⁷ Ukundi hati. Tala, eci oco muẽle nda sanga poku kũlĩhisa cimosi cimosi si sangi elomboluilo,

²⁸ momo olio muẽle utima wange wa vanjalaya, puãi sia li sangele. Pokati kohũlũkãi yalume nda sanga ulume umuamue, puãi ukaĩ pokati ka vosi yavo sia sangele.

²⁹ Tala, cimosi lika nda sanga ceci: Suku wa sovola omunu okuti o sunguluka, ovo muẽle puãi va panga ovipango via lua.