UKUNDI 6 - Embimbiliya - Bíblia Sagrada em Umbundu

¹ Vemehi liekumbi nda muilamo cimue cĩvi haico ca puiya komanu, ceci:

² Omunu umue Suku wo wiha ipako lukuasi kuenda ekemalo okuti lacimue a livela co kamba, haimo Suku ko wihile otembo yoku liako, umue wiñi wa vi lia. Eci lacovo esanda, haico ohali ya lua.

³ Ulume ndaño o cita ocita comãla kuenda o kasi lomuenyo anyamo alua, okuti oloneke viomuenyo waye via lua, puãi ka sanjukila ovina viwa viomuenyo pamue ka kuete ava vo kenda, ame ndinga siti, U wa pulumuiwa wa velapo, eye o sule.

⁴ Momo u wa pulumuiwa iya ño kuenje enda kowelema, londuko yaye ya wundisua vowelema.

⁵ Kuenje ka la mola ekumbi, ndaño oku kuliha cimue, haimo wa sanga epuyuko osimbu ukuavo ka li sangele.

⁶ Ndaño o kala lomuenyo olohũlũkãi vivali vianyamo puãi ka sanjukila ovina viwa, ka va endi vosi kocitumãlo cimuamue hẽ?

⁷ Upange wosi womunu u lingiwila imo liaye, haimo oñi yaye yokulia ka yi telisua.

⁸ Ukualondunge wa velapo ndati okuti eveke li sule? Osuke ya kũlĩha oku endela kovaso ava va kasi lomuenyo yi kuete nye?

⁹ Okumõla kuovaso kua velapo, okutungayala kuoñi ku sule; lacovo esanda haico oku seteka oku kuata ofela.

¹⁰ Cosi ci kasi ale ci kuete ale onduko, ndeci ca tuwa omunu ca kũlihiwa cokuti, ka tẽla oku tamãlãla lu wo velapo.

¹¹ Olondaka nda vi lua esanda laliovo li lua. Omunu hẽ wa velapo ndati?

¹² Elie wa kũlĩha eci ci kuatisa omunu osimbu a kasi lotuneke tuomuenyo waye wupolokoso, haituo tu pita ño ndulembo? Elie o tẽla oku sapuila omunu ovina viu kuama noke vemi liekumbi?