UKUNDI 5 - Embimbiliya - Bíblia Sagrada em Umbundu

¹ Nda wenda konjo ya Suku enda lesumbilo, oku amẽlako hu yevelela kua velapo, oku lumba ovilumba viaveke ku sule; momo ovo ka va ci okuti va linga cĩvi.

² Ku ka linge osiata lomẽla wove, ku ka tave okuti utima wove u tukuila lonjanga ondaka yimue kovaso a Suku; momo Suku o kasi kilu kuenda ove o kasi palo posi; oco olondaka viove vi linge viñamiñami.

³ Momo kesakalalo lia lua ku tunda onjoi, kuenda komela weveke ku tunda olondaka via lua.

⁴ Nda o lisila ocisila la Suku ku ka livale oku ci linga; momo eye ka sanjukila aveke. Linga eci wa lisila.

⁵ Ca velapo okuti ku lisila, oku lisila kuenje ku ci lingi, oco cĩvi.

⁶ Ku ka tave okuti omẽla wove u ku lueyisa, ku ka popele kovaso ocitunda huti, Nda lueya omo nda ci lisila. Suku o temẽla nye ondaka yove pamue o nyõlela nye upange wovaka ove?

⁷ Momo volonjoi via lua muli esanda, haico volondaka via lua muli oku nyoleha; puãi ove kuatela Suku usumba.

⁸ Vofeka yimue nda o lete okuti olosuke vi kasi loku lingisiwa, pamue o lete okuti esunga locili vi kasi loku upiwamo longusu, ku ka ci komõhele; momo ombiali yinene yi kasi oku ci linga yi lavuluiwa leyi ya velapo vali; kuenje kilu liavo kuli vali yimue ya va velapo vosi.

⁹ Puãi eci ci tunda kupange woposi ca vosi. Ndaño osoma yi sanga ukuasi wayo vovapia.

¹⁰ U o sole olombongo kekuta olombongo; ndaño yu o sole elau kekuta okulua kuovipako. Eci lacovo esanda.

¹¹ Nda ovikuata vi lua, ava va vi lia lavovo va luavo; kuenje u o kasi lavio o mõla nye, te oku vi vanja ño lovaso aye.

¹² Otulo tuondingupange tu sõsã, ndaño wa lia citito ndaño wa lia ca lua; puãi ekuto liohuasi liu pumbisa otulo.

¹³ Vemẽhi liekumbi nda muilamo evĩho limue lĩvi, lieli: Ukuasi wa solekiwile puãi poke wa tatamisa muẽle yaco.

¹⁴ Ukuasi waco wa peselelua vupange umue ka mua tundile cimue. Muẽle yaco, eye onjali yomõla ulume puãi lacimue a kuete peka.

¹⁵ Ndeci a tunda vimo lia inaye haico a ka enda, lepõlõla eya lalio hailio a ka enda lalio; kambata peka cimue ca tunda kupange waye.

¹⁶ Eci lacovo evĩho lĩvi, ndeci eya haico a ka enda. Onima ye a sanga kupange wolivova?

¹⁷ Onima ye a sanga koloneke viowelema lupongo, levi vioku vela lesakalalo liutima?

¹⁸ Tala, eci nda mõla cokuti oco ciwa haico ca posokela omunu ceci: oku lia kuenda oku nyua loku sanjukila upange wosi omunu a talavayela vemehi liekumbi oloneke viñamiñami Suku a wiha, momo eci oco caye.

¹⁹ Omunu lomunu Suku wo wiha ukuasi lovipako, kuenje wo wihavo otembo yoku liako, loku tula utima kuosi a kasi, loku sanjukila upange waye, eci oco ocali ca tunda ku Suku.

²⁰ Kuenje eye ka ivaloka ca lua oloneke viomuenyo waye momo Suku u suisilapo onjongole yutima waye.