UKUNDI 3 - Embimbiliya - Bíblia Sagrada em Umbundu

¹ Momo ovina viosi vi kuete uvo wavio, ovina viosi vemẽhi lilu vi kuete eteke liavio:

² eteke lioku citiwa kuenda eteke liokufa; eteke lioku kũla, kuenda eteke lioku lombola eci ca kũliwa;

³ eteke lioku ipa, kuenda eteke lioku sakula; eteke lioku tungulula, kuenda eteke lioku tunga;

⁴ eteke lioku lila, kuenda eteke lioku yola; eteke lioku sinumũla, kuenda eteke lioku cĩla;

⁵ eteke lioku inasi ovawe, kuenda eteke lio ku ongolola ovawe; eteke lioku angata, kuenda eteke lioku yuvula oku angata;

⁶ eteke lioku sanda, kuenda eteke lioku nyelĩsa; eteke lioku soleka, kuenda eteke lioku inasi;

⁷ eteke lioku tola, kuenda eteke lioku tonga; eteke lioku ũha, kuenda eteke lioku popia;

⁸ eteke lioku sola, kuenda eteke lioku suvuka; eteke liovita, kuenda eteke liombembua.

⁹ Ukuakutalavaya o limuisa nye lupange a linga?

¹⁰ Nda mõla upange Suku a eca komãla vomanu ha va sakalala lawo.

¹¹ Cosi wa ci posuisila uvo waco. Wa kapa elivelo lievi ka vi pui vutima womanu okuti ka va tela oku limbuka eci ca linga Suku tunde kefetikilo toke kesulilo.

¹² Nda kũliha okuti kokuavo ka kuli ca velapo, okuti oku sanjuka loku kala ciwa osimbu va kasi lomuenyo ci sule.

¹³ Nda kuliha vo okuti nda omunu o lialia kuenda o nyuanyua kuenda o sanjukila upange waye wosi, cosi eci ocali ca tunda ku Suku.

¹⁴ Nda kulihavo okuti eci ca linga Suku oco ka ci pui, ka ci vokiyiwa, ka ci tepuluiwa; Suku wa ci lingila okuti omanu vo sumbila.

¹⁵ Eci ci kasi ca kaile ale; eci ci kala ca kaile ale, kuenje Suku o tiula tiula eci ca pita.

¹⁶ Kuenda vali nda vanja vemehi liekumbi kuenje nda limbuka okuti omu mu sesamela esunga omo muli evĩho, kuenda omu mu sesamela ocili omo muli esanda.

¹⁷ Nda popia lutima wange siti, Suku o tetuluila vakuesunga kuenda vakuevĩho, momo cosi wa ci sokiyila otembo yaco, ci kale ondaka, ci kale upange.

¹⁸ Oku sokolola omãla vomanu nda popia lutima wange siti, Suku o kasi oku va nyika ha va limbuka okuti ovo muẽle ovinyama.

¹⁹ Momo esulilo liomala vomanu lesulilo liovinyama limuamue, ndeci ci fa u haico ci fa ukuavo, vosi yavo okufuima kumuamue, kuenda omunu ka velelepo, okuti ovinyama vi sule; momo cosi esanda.

²⁰ Vosi va sulila kumuamue, vosi vakuaneketela, vosi va tiukila koneketela.

²¹ Elie wa kuliha nda hẽ ocilelembia comãla vomanu cenda kilu, kuenda ocilelembia covinyama cenda posi?

²² Oco nda limbuka okuti cimue ca velapo ka kuli, okuti omunu oku sanjukila upange waye ci sule, momo oyo onepa yaye, elie u lekisa eci cu kuãi?