UKUNDI 2 - Embimbiliya - Bíblia Sagrada em Umbundu

¹ Oco nda likunda lutima wange, siti, Kaliye, kua ca, nyika muẽle asanju oluali, sanjuka lasanju oluali, kuenje tala, eci lacovo

² Nda lombolola oku yola, siti, Oku vela kutue; nda limbuka asanju oluali kuenje siti, A silivila nye?

³ Nda sokolola ndomo nela oku sanjuisa etimba liange lovinyu, utima wange lopo wa songola lolondunge, nda sokololavo ndomo nẽla oku enda lehungu, okuti oco ndimbuke eci ca sungulukila omãla vomanu okuti va ci linga vemi lilu oloneke viñamiñami viomuenyo wavo.

⁴ Nda linga ovopange anene; nda litungila olonjo, nda likũlĩla oviumbo viayuva;

⁵ nda lisowila oviumbo vioviti kuenda ovisenge, kuenda nda tuikamo oviti viapako osi.

⁶ Nda lifẽlẽla ovisimo viovava oku tapela asisi omu nda kũla oviti.

⁷ Nda landa apika valume lapika vakãi, nda kala lapika va citiwila vonjo yange; nda fuka oviunda violongombe levi violomeme okuti viange via lua, via vosi va kaile ale vo Yerusalãi vi sule.

⁸ Nda kongelavo ulu lopalata kuenda ukuasi wolosoma lowu wovikanjo; nda kala lolonjimbi vialume, lolonjimbi viakãi, nda kala lakama va lua, haivo esanju liulume.

⁹ Oco nda linga omunu unene, nda pitahãla vosi va limbangelele vo Yerusalãi, lolondunge viange laviovo via kala lame.

¹⁰ Cosi ca livela ovaso ange ame sia a ci pumbisile; sia kandangiyile utima wange esanju limue lioluali momo utima wange wa sanjukila upange wange wosi, eci oco onima yupange wange wosi.

¹¹ Oco nda vanja kovopange osi a linga ovaka ange kuenda upange wosi nda sakalala loku u linga; kuenje tala, cosi esanda haico oku seteka oku kuata ofela. Lacimue covemi liekumbi ci linga cimue.

¹² Oco nda fetika oku sokolola olondunge luyui kuenda esanda; momo omunu o kuai osoma o tela oku linga nye? Te eci a lingainga ale.

¹³ Oco nda mõla okuti olondunge via velapo, uveke u sule, ndeci ocinyi ca velapo, okuti owelema u sule.

¹⁴ Ovaso ukualondunge a kasi vutue waye, puãi eveke endaila vowelema; haimo nda limbuka okuti esulilo liavo vosi limuamue.

¹⁵ Oco nda popia lutima wange siti, Ndeci ci kala leveke haico ci kala lame; oco, nda kuatela nye olondunge? Oco nda popia lutima wange siti, Eci lacovo esanda.

¹⁶ Momo ci kale ukualondunge ci kale eveke ka kuli onjivaluko ka yi pui, momo voloneke viokovaso ovina viosi vivaliwa osimbu. Ndeci ci fa ukualondunge haico ci fa eveke.

¹⁷ Oco nda suvuka omuenyo omo eci ci lingiwa vemi liekumbi ca sumuisa; momo cosi esanda kuenda oku seteka oku kuata ofela.

¹⁸ Nda suvuka upange wosi nda linga vemi liekumbi momo wosi ndu sila omunu o ñuama.

¹⁹ Kuenje elie wa kuliha nda hẽ eye o kala ukualondunge ale, ele eveke? Haimo eye o viala cosi nda ci talavayela lolondunge vemi liekumbi. Eci lacovo esanda.

²⁰ Oco nda litiulamo, nda likapa kolukonyo, oku sokolola upange wosi nda talavaya vemehi liekumbi.

²¹ Momo olonjanja omunu o talavaya lolondunge lukũlihĩso kuenda luloño, kuenje cosi o ci sia ha ci sanjuisa umue ka ci talavayelele. Eci lacovo esanda haico cĩvi ca lua.

²² Momo omunu o kuata nye kupange wosi lesakalalo liosi a talavaya lalio vemi liekumbi?

²³ Momo oloneke viaye viosi vieyuka otokua, lupange waye ovitangi lika. Ndaño uteke ka puyuka cocili. Eci lacovo esanda.

²⁴ Ciwa komunu ceci, oku lia loku nyua loku sanjukila upange waye, ca velapo ka kuli. Leci le nda limbuka okuti ca tunda ku Suku.

²⁵ Momo nda hayeko helie o lia? Kuenda helie o sanjuka?

²⁶ Momo omunu o sanjuisa Suku, Suku o wiha olondunge lukũlihiso kuenda esanju; puãi kukuekandu eca upange woku ongolola lowu woku soleka ovina viaco ha vi endi ku-u Suku a sanjukila. Eci lacovo esanda kuenda oku seteka oku kuata ofela.