UKUNDI 12 - Embimbiliya - Bíblia Sagrada em Umbundu

¹ Ivaluka Usovoli wove voloneke viove viutila, osimbu oloneke vĩvi ka vieyile, kuenda anyamo a tomboka eci o popia huti, Si vi sanjukila,

² osimbu ekumbi locinyi kuenda osãi lolombungululu ka via takatele, kuenda alende ka a tiukilile eci ombela ya ca;

³ keteke eci olondavululi vionjo vi luluma, lalume va pama va liketika, kuenda eci vakuakufula va liweka omo ka va luile; lava va lengelela volonjanela va lisĩkĩlila,

⁴ kuenda apito okoluwa a yiliwa; eci okuõla kuomuinyo kua tepuluka, kuenda omunu o pasuka lokuimba kuonjila, lolonjimbi ka vi yevala cocili.

⁵ Kuenda vali va kasi lusumba weci ca lepa, volokololo mu linga usumba, uti wa-amendoeira u tẽlẽha, epange li likoka ño, olundungu ka lu luli vali, momo omunu enda konjo yaye ka yi pui, kuenje vakuakulila va ñuala ñuala volokololo,

⁶ osimbu ukolo wopalata ka wa tepele, pamue ocilindo culu ka ca file, osimbu ombia ka ya nyanyohaile kono, pamue elola liokocisimo ka lia tekele,

⁷ osimbu oneketela ka ya tiukilile posi ndeci ya kaile, lomuenyo wa tiukila ku Suku u wo wecele.

⁸ Ukundi wa linga hati, Esanda kasanda. Cosi esanda.

⁹ Ocili Ukundi wa kala ukualondunge, kuenje kilu liaco wa longisa omanu ukulihiso, wa yeva olosapo, wa vi sokolola, noke wa vi sokiya oku vi soneha.

¹⁰ Ukundi wa sanda olondaka via sunguluka, kuenje locili caye cosi wa soneha olondaka viocili.

¹¹ Olondaka via vakualondunge via lisoka lolosongo; lolosapo via tiwa lungombo umuamue via lisoka lolopeleko via valeliwa longusu.

¹² Amõlange, lunguka lelilongiso limue liñi. Momo oku sovola alivulu a lua ka ku sulila, kuenje okulilongisa enene ku kavisa etimba.

¹³ Oco kua pua. Cosi ca yeviwa. Sumba Suku, pokola kovihandeleko viaye; momo eci oco ocikele comanu vosi.

¹⁴ Momo Suku o yalela ovina viosi ekanga, ndaño ovina viosi via vunda, ci kale evi viwa, ci kale evi vĩvikopokati kavele ange.