UKUNDI 11 - Embimbiliya - Bíblia Sagrada em Umbundu

¹ Imba ombolo yove kilu liovava, kuenje o yi sanga vali kovaso yoloneke via lua.

² Eca olombanjo viove komanu epanduvali pamue ecelãla; momo kua kũlĩhile eci cĩvi ciya kilu lieve.

³ Alende nda eyuka ombela, a yi pesila kongongo; kuenje uti nda u kupukila konano, pamue u kupukila kombuelo, oko uti u kupukila haiko u kala.

⁴ U o lavulula ofela ka imbi ombuto; lu o lavulula alende ka lombola.

⁵ Ndeci kua kũlĩhile onjila yolofela, pamue ndeci kua kũlĩhile ndomo akepa a kulila vimo liu o misi, haico kua kũlĩhile upange wa Suku, una o sovola ovina viosi.

⁶ Omẽle imba ombuto yove, oñolosi eka ka li ka lembuke; momo kua kũlĩhile nda ombuto ye nda ombuto ye yima ciwa, nda yeyi nda yoyo, ale nda viosi vi eca ciwa.

⁷ Ocinyi ci pepa kuenda ciwa nda ovaso a lete ekumbi.

⁸ Nda omunu o kala lomuenyo anyamo a lua, a a sanjukile osi, haimo puãi a ivalukevo okuti oloneke viowelema laviovo vi lua. Cosi ci laika oku iya esanda.

⁹ Okuenje, yolela oloneke viove viovokuenje; utima wove u ku sanjuise voloneke viove viovokuenje; enda ndeci utima wove u panga; enda oko ovaso ove a lete; puãi limbuka okuti Suku o ku tetuluila ovina evi viosi.

¹⁰ Oco upa olohele vutima wove, kuenda olongembia vi pue vetimba liove; momo oloneke viovokuenje ndaño viovutila viosi esanda.