UKUNDI 10 - Embimbiliya - Bíblia Sagrada em Umbundu

¹ Olonyi via fa vi lehisa cĩvi onguendu ya tĩla yukuaku yi tunga; haico okasanda kaño ka imũla olondunge kuenda ekemalo.

² Utima wukualondunge u-u tiamisa kondio, puãi utima weveke u-u tiamisa kepĩli.

³ Eveke ndaño li endela vonjila haimo lia kamba olondunge, kuenje o sapuila vosi, hati, Ndiveke.

⁴ Nda onyeño yombiali yi ku wengukila, ku ka tunde vomangu yove, momo umbombe u tulumula ahuku a lua.

⁵ Kuli evĩho limue nda muĩla vemehi liekumbi, hailio huti ño okulueya ño kuombiali, lieli:

⁶ Aveke a kapiwa kolomangu via velapo, kuenje olohuasi vi tumãla kovitumãlo viaño.

⁷ Nda mõla apika va endela kotuvalu osimbu omãla va Soma va endela posi ndapika.

⁸ U o fẽla okueve o famo eye muẽle; lonyoha yi lumana u o tuiya ocimano.

⁹ U o fẽla ovawe ovawe aco o lundika; lu o tetula oviti o lisipata.

¹⁰ Ocikete nda ca kuna kuenje muẽle ka ci lepika ci mala ongusu yu o talavaya laco; puãi olondunge vi kuatisa oku sanga onima yupange.

¹¹ Onyoha nda ya lumana osimbu ka ya pambelelue ihemba, ka ci silivila vali oku kovonga ocimbanda caco.

¹² Olondaka viomẽla wukualondunge viu kokela oku soliwa, puãi olonjembue vieveke viu nyõla.

¹³ Efetikilo liolondaka viomẽla walio esanda, kuenda esulilo liokupopia kualio olio uyui wa piãla.

¹⁴ Eveke li luisa olondaka, ndaño lomue o kũlĩha eci ciya, elie o tẽla oku li sapuila eci ci lingiwa noke?

¹⁵ Upange weveke u u kavisa, okuti ka kũlĩha onjila yenda kimbo.

¹⁶ Afeka, ohali yove muẽle nda osoma yove omõla, kuenda akulu va Soma yove va lia loku nyua omẽle.

¹⁷ Puãi afeka, wa sumũluha muẽle, nda osoma yove ukuambuto yusoma, nda akulu va Soma yove va lia loku nyua kotembo ya sesamela, kuenje va ci lingila oku kuata ongusu hakukoluako.

¹⁸ Owesi u yombisa olusoka, omo usiai wa lua, oco vonjo mu lokiwa.

¹⁹ Okulia ku kapelua onjolela, lovinyu vi sanjuisa omuenyo, kuenda olombongo vi tẽla cosi.

²⁰ Ndaño vovisimĩlo viove ku ka popie osoma, ndaño vohondo yove yoku pekela ku ka popie olohuasi; momo onjila yovilu yambata ondaka yove, kuenda ocendalomuenyo cimue ci kuete avava ci yi sapula.