UKUNDI 1 - Embimbiliya - Bíblia Sagrada em Umbundu

¹ Evi olondaka viukundi, omõla a Daviti, osoma yovo Yerusalãi.

² Ukundi hati, Esanda kasanda, esanda kasanda, ovina viosi esanda.

³ Omunu o limuisa nye lupange wosi a lingainga vemi liekumbi?

⁴ Ocitumbulukila eci cenda, ocitumbulukila cikuavo ciya, puãi ongongo yi kala ño-o hũ, ka yi pui.

⁵ Ekumbi li tunda, noke ekumbi liñila, kuenje li yayuila vali kutundilo walio.

⁶ Ofela yenda ko Sul, kuenje yi ñuala, yi tiukila ko Norte; yi tongeka oku ñuala ñuala, kuenje ofela yi tiukila volonjila viayo.

⁷ Olondui viosi via itila vokalunga, puãi okalunga ka ke yukile; oku olondui vi endaenda, haiko vi enda vali.

⁸ Ovina viosi vieyuka ekavo; omunu ka tela oku ci popia; iso ka li kuta oku vanja, ndaño etui ka li kuta oku yevelela.

⁹ Eci ca kaile haico ci kala, eci ca lingiwile, haico ci lingiwa; kuenje ka muli cimue cokaliye vemi liekumbi.

¹⁰ Kuli cimue omunu o ci lekisa hati, Tala, eci cokaliye? Ca kaile ale kosiahũlu, osimbu ka tua kaileko.

¹¹ Ka kuli onjivaluko yovitumbulukila viale, ndaño pokati kava va tu kuãi ka pa kala onjivaluko yovitumbulukila viokovaso.

¹² Ame Ndukundi, nda kaile Soma yava Isareli vo Yerusalãi.

¹³ Ame nda kapa utima wange oku sanda kuenda oku limbuka lolondunge ovina viosi vi lingiwa vemi lilu; upange wa kãla owo Suku wa eca komãla vomanu oku sakalala lawo.

¹⁴ Nda mõla cosi ci lingiwa vemi liekumbi; kuenje tala, cosi esanda, kuenda oku seteka oku kuata ofela.

¹⁵ Eci ca penga ka ci tẽla oku penguluiwa, leci ca kamba ka ci tẽla oku tendiwa.

¹⁶ Nda vangula lutima wange, siti, Ota, nda kuata olondunge via lua, vosi va vialele ale vo Yerusalãi va sule; olondunge kuenda ukũlihiso vutima wange via ikamo.

¹⁷ Yu nda likapela oku kũliha olondunge, loku kũliha uyui kuenda uveke. Nda limbuka okuti eci lacovo oku seteka oku kuata ofela.

¹⁸ Momo nda olondunge via lua, ohali yi lua; kuenje u o luisa ukũlihiso o luisa esumuo.