TITO 3 - Embimbiliya - Bíblia Sagrada em Umbundu

¹ Ivaluisa omanu okuti va sumbila olombiali lolosoma, loku vi pokola, loku kala lutima woku linga upange wosi ño uwa.

² Ka va ka popie umue cĩvi. Ka va ka linge olonjaki. Vomboke, loku kala lusima pokati komanu vosi.

³ Momo ale letuvo tua kaile aveke, tua sinile, tua kembiwile, tua kaile apika voloñeyi viñi viñi, lasanju aiñi aiñi. Tua kaile locipombo lonya. Tua suvukiwile lomanu, kuenje tua lisuvukaile pokati.

⁴ Puãi, eci ohenda ya Suku Upopeli wetu, locisola caye ka ci pui, via tukuluka,

⁵ oco Suku wa tu popela, haku tu popelelako ovilinga viesunga tua linga etu muẽle, puãi oku tu popelela ohenda yaye. Wa tu popela loku tu sukula lovava epapatiso liucito wokaliye, kuenda etumbuluko ve Espiritu Sandu,

⁶ lina a tu sukumuila la Mitakati Yesu Kristu Upopeli wetu.

⁷ Wa tu li sukumuilila okuti locali caye, tu tendiwa ndavakuesunga kuenje tu linga vakapiñala kelavoko liomuenyo ko pui.

⁸ Ondaka yaco ondaka yocili. Njongola okuti o longisa ovina evi longusu okuti ava va tava ku Suku va pindamua loku linga lutate ovopange awa. Ovina evi viwa kuenda vi silivila komanu.

⁹ Puãi yuvula olombangulo viuveke, levi vioku sinumula ño-o ovikoti viapata, loku hoya, loku yakela ño-o ovihandeleko, momo ka vi kuatisa kuenda ka vi silivila.

¹⁰ Ukuakuhoya, eci u lemela onjanja yimosi pamue olonjanja vivali, litepa laye.

¹¹ Momo wa kũlĩha okuti omunu wa soka ndo wa puiya, haeye ukuakulueya, wa lipisa eye muẽle.

¹² Eci numa kokuove Artema pamue Tukiko, kolisako oku iya lombili kokuange ko Nikopoli. Momo nda panga oku tumala oko kotembo yombambi.

¹³ Kuatisa ciwa Sena onganji la Apolosi eci va enda ungende wavo. Ka va ka kambe cimue.

¹⁴ Omanu vetu va likise oku talavaya upange uwa wovaka okuti va sanga eci va kuatisa laco ovopange ocili. Ka va ka kale ndomanu ka va imi epako.

¹⁵ Vosi va kasi lame va ku lamapo. Lamapo ava va tu sole vekolelo. Ocali ci kale lene vosi.