TITO 2 - Embimbiliya - Bíblia Sagrada em Umbundu

¹ Ove puãi, longisa eci ca sesamela ava va longisiwa ovilongua viocili.

² Lungula olosekulu okuti ka vi ka kolue, vi likandangiye, vi sunguluke, vi kolepo lekolelo locisola lepandi.

³ Lungulavo akulu vakãi okuti va linga vakuesumbilo, ka va ka linge vakualundi, pamue apika vovinyu, va linge alongisi vovina viwa

⁴ okuti va longisa akãi vamãlehe oku sola vaveyavo lomãla vavo,

⁵ loku lisuluvika, loku lipua, loku linga upange wolonjo viavo, loku unjuka loku pokola ku vaveyavo, oco ondaka ya Suku ka yi ka tondaliwe.

⁶ Alume vamalehe haico, va lungula okuti va lisuluvika.

⁷ Ove muẽle, kovina viosi, ecaeca ongangu yovilinga viwa. Pokulongisa kuove lilekisa okuti wulongisi wocili, haive wa litumbika ocili.

⁸ Longisa evi viocili haivio ka vi patãliwa, okuti, u o yongola oku patãla o kutisua osõi, momo ka kuete eci a tu popela cĩvi.

⁹ Sapuila akuenje okuti va pokole ku vacime cavo loku linga lesunga upange wavo wosi. Ka va ka linge vakuatatelelo.

¹⁰ Ka va ka yombolole, puãi va linge vakuacili, okuti kovina viosi va imbila ondaka ya Suku Upopeli wetu uvangi wocili.

¹¹ Momo ocali ca Suku ca tukulukila omanu vosi oku va nenela epopelo.

¹² Ci tu longisa oku imbapo oku tomba Suku lovipango violuali, loku kala lesuluviko lesunga kuenda ovimuenyo vi kemalisa Suku voluali lulo,

¹³ osimbu tu talamela elavoko liesumũlũho, hailio etukuluko liulamba wa Suku Tõlo kuenda Upopeli wetu Yesu Kristu.

¹⁴ Eye Yesu wa liecela ha tu yovola kevĩho liosi, loku lisokiyila omanu va yelisua, ha va lingi omanu vaye muẽle, haivo vakuambili yokovilinga viwa.

¹⁵ Longisa ovina evi. Lungula omanu, loku va veta evelo, omo o kasi lomoko yaco. Lomue ka ka ku lavise.