TITO 1 - Embimbiliya - Bíblia Sagrada em Umbundu

¹ Ame ndi Paulu ndukuenje wa Suku, haime ndupostolo wa Yesu Kristu. Nda noliwila upange waco okuti ñamisa ekolelo liava va noliwa la Suku, loku amisavo ukũlĩhiso wavo woku kũlĩha Ocili, haico ca lomboloka omuenyo woku sumbila Suku.

² Upange waco ndu lingila velavoko liomuenyo ko pui. Suku, u lalimue eteke a kemba, eye wa likuminya omuenyo waco konahululua.

³ Kotembo yaye ya sokiyiwa wa situlula ondaka yaye. Oku sapula ondaka yaco oco ocikundi ca nyihiwa la Suku Upopeli wetu.

⁴ Ndi sonehela Tito omõlange wocili vekolelo lietu limuamue. Ocali lombembua yi tunda ku Suku Isietu kuenda ku Kristu Yesu Upopeli wetu yi kale love.

⁵ Eci nda ku sila vo Kurete ceci okuti, o sokiya ovina via kamba, kuenda okuti, vovaimbo osi o nola akulu, ndeci nda ku sapuila.

⁶ O nola alume va pua eko, haivo vakuokãi umosi. Omãla vavo lavovo te va linga vakuetavo, kuenje ka va vanguiwa okuti vakuavimuenyo viombuanja pamue vakuahuku.

⁷ Momo ca sesamela omunu osungu yekongelo, haiyo kalei ka Suku, oku pua atondelo. Ka ka kale ukuakulituna. Ka ka kale ukuanyeño, pamue oholua, pamue ongangala, pamue ukuakulivela oku limuisa longanyu yevĩho.

⁸ A kale puãi omunu o sanjukila akombe, haeye o sole esunga, kuenda o tẽla oku lipokuisa eye muẽle. A kale omunu wa sunguluka, haeye o kola, kuenje o tava oku lihandeleka.

⁹ A limbuke ocikele caye coku kolela lika ondaka yocili ndomo yo longisiwa, okuti noke o tẽla oku lungula londaka yaco yocili, loku tamalala lava va yi patãla.

¹⁰ Momo kuli vakuemande va lua, haivo amamõhe lolondimbiki, ca piãla enene pokati ka vakuevamba.

¹¹ Ca sunguluka oku va handeleka okuti ka va popi, momo va kasi loku sakalaisa olonjo poku longisa ovina haviociliko loku ci tambuila olombongo.

¹² Umue uprofeto wavo muẽle wa linga hati, Va Kurete olohembi lika, ovinyama vĩvi, ovisiãi via sapa.

¹³ Uvangi u wocili. Oco, va veta evelo lia piãla okuti va kuata etavo liocili,

¹⁴ oku yevelela ño kolosapo via va Yudea, pamue kovihandeleko viomanu va yapuka kovina viocili, hacoko.

¹⁵ Kuava va yela ovina viosi vi yela, puãi, ku vakuevĩho kuenda kuava ka va kuete ekolelo, lacimue ci yela. Ndaño olondunge viavo, ndaño ovitima viavo, viosi via liña.

¹⁶ Va popia vati, Tua kũlĩha Suku, puãi vo likala lovilinga viavo. Omanu vaco vãvi enene, va sina sina, kuenje kovilinga viosi viwa ka va silivila, ndaño naito.