TIAGO 4 - Embimbiliya - Bíblia Sagrada em Umbundu

¹ Pokati kene ovita vi tunda pi, lovama a tunda pi? Hakoloñeyi vieneko hẽ, vina vi liyaka vovimatamata viene?

² Vu yongola kuenje ka vu kuete, oco wipãli. Vu livela kuenje ka vu tẽla oku kuata, oco vu sovola ovama lovita. Ka vu kuete momo ka wa pingili.

³ Vu pinga kuenje ka vu tambula, momo ka vu pingi lesunga, vu pingila ño oloñeyi viene.

⁴ A vakahonga, ka wa kũlĩhili okuti ukamba wa livali loluali owo ukuse la Suku? Oco, wosi o yongola oku linga ekamba lioluali o lilingisa unyali wa Suku.

⁵ Ele wa soki okuti ovisonehua vi popia esanda eci vi popia viti, Espiritu a kapa volonulo vietu o li kuetele ongeva?

⁶ Puãi ecaeca ocali ca piãla. Oco via popela viti, Suku o yaka la vakueyengu, puãi ecaeca kambombe ocali caye.

⁷ Oco, pokoli ku Suku. Tamalali leliapu kuenje liu tili.

⁸ Ameli ku Suku kuenje eye amela kokuene. A vakuakandu, yelisi ovaka. A vakuavitima vivali, puisi ovitima viene evĩho.

⁹ Sumui. Lili. Lisiõsiõli. Ovinjola viene vi pongoloke oku liyula, lesanju liene li pongoloke esumuo.

¹⁰ Lisepuisi kovaso a Ñala kuenje eye u kapi kunene.

¹¹ A vamanjange, ko ka lisokoli pokati. U o sokola ukuavo, pamue o pisa ño ukuavo, o sokolavo ovihandeleko kuenda o pisa ovihandeleko. Puãi, nda o pisa ovihandeleko kua lingile vali omunu o pokola kovihandeleko, puãi wa linga onganji.

¹² Kuli umosi lika o sovola ovihandeleko kuenje haeye wa linga onganji, okuti yu o tẽla oku popela loku nyõla. Puãi ove elie okuti o tetuluila ukuẽle?

¹³ Ene vu popia hoti, Etaili, pamue hẽla, tu enda kimbo liongandi ha tu kalako unyamo oku fũla loku limuisa, sokololi,

¹⁴ momo ka wa kũlĩhili eci ciya hẽla. Omuenyo wene nye? Momo ene vumbundu yi moleha lika okatembo katitotito kuenje noke yi takata.

¹⁵ Co velelipo oku popia hoti, Nda Suku wa panga, kuenda tu kala lomuenyo, tu linga eci leci.

¹⁶ Puãi vu lipanda ño loku lituna. Okulipanda kuaco kuosi kũvi.

¹⁷ Wosi wa kũlĩha eci ca sunguluka oku linga kuenje ka ci lingi, cu tendelua ndekandu.