TIAGO 3 - Embimbiliya - Bíblia Sagrada em Umbundu

¹ A vamanji, ko ka tavi okuti pokati kene va lua va linga alongisi, momo wa kũlĩhi okuti etu tualongisi tu tetuluiwa ca piãla vali enene.

² Momo etu vosi tuakuaku lueya lueya lovina via lua, kuenje nda umue ka lueya leci a popia, eye omunu wa pua eko, haeye o tẽla oku kapa olelia ketimba liosi.

³ Nda tu kapa ololelia volomẽla viotuvalu ha tu pokola kokuetu, tu tẽla oku ñualisapo lavio atimba atuo osi.

⁴ Talivo olonaviyu ndomo vi kasi, vinene vinene, kuenda vi pungua lolofela vi kuete ongusu, haimo vi ñualisua locipando cititotito kuoha ukuacipando a panga.

⁵ Haico elimi, okacimatamata katitotito ketimba, haimo li lipandela ovina vinene. Sokololi ndomo usenge unene u mihiwa lokandalu katitotito.

⁶ Elimi ondalu. Vatimba etu lia linga uviali wevĩho pokati kovimatamata. Li vĩhisa etimba liosi. Cosi covimuenyo vietu ci mihiwa lalio. Ondalu yonjembo yi li miha.

⁷ Momo ci tava oku pokuisa ovinyama violombuto viosi, lolonjila viosi, lapuka osi, loviendalomuenyo viosi viovokalunga, kuenje via pokuisua ale lomunu,

⁸ elimi puãi, lomue omunu o tẽla oku li pokuisa, lie yuka owule u koka okufa, kuenje ka li puyuka oku sovola evĩho.

⁹ Tu sivaya lalio Ñala haeye Isia, hailio tu tuka tuka lalio omanu va lulikiwa lesetahalo lia Suku.

¹⁰ Vomẽla umuamue mu tunda esivayo kuenda etuka. A vamanji, oku linga ndoco haciwako.

¹¹ Vono yimuamue hẽ, mu tunda ovava a pepa la-a a lula?

¹² A vamanji, ci tava nga okuti ukuyu wima asetona, pamue uyuva wima akuyu? Haico ovava omongua ka a lingi a a pepa.

¹³ Pokati kene hẽ, helie ukualondunge haeye wa lunguka? Omunu waco, komuenyo waye uwa, a lekise ovilinga viaye, a vi lekise puãi lumbombe u tunda kolondunge viocili.

¹⁴ Puãi, nda vovitima viene muli ukuse kuenda ovilivelo vioku livelisapo lika, ko ka lipandi okuti vu kembisa ovina viocili.

¹⁵ Olondunge evi havioko vi tunda tunda kilu, puãi vioposi, haivio violoñeyi vĩvi leliapu.

¹⁶ Momo apa pa kuete onya lovilivelo vioku livelisapo lika, opo pali olonamalala lovilinga viosi vĩvi.

¹⁷ Puãi olondunge viokilu, tete via pua evĩho, vali viombembua, haivio vionjuka kuenda via sunguluka, haivio vie yuka ohenda lapako awa, kuenda via pua atatahãi lelimbi.

¹⁸ Epako liesunga li kũliwa vombembua la vakuakulinga ombembua.