TIAGO 2 - Embimbiliya - Bíblia Sagrada em Umbundu

¹ A vamanji, ko ka kuateli omanu ocame nda wa koleli ocili Ñala yetu Yesu Kristu haeye Ñala yulamba.

² Momo, nda vosunangonga yene mua iñila ulume wa wala uwalo wa fina lonẽla yulu, kuenje mua iñilavo osuke ya wala uwalo waño,

³ kuenje nda vu lama u wa wala uwalo wa fina, loku popia laye, hoti, Ndo tumale palo pawa,— puãi osuke vu popia laye hoti, Ove, ka talame oko,— pamue hoti, Tumala pociliatelo cange,—

⁴ ka wa litepisili hẽ ene muẽle, ka wa lingili hẽ olonganji vi kuete ovisimilo vĩvi?

⁵ A vamanjange va soliwa, yeveleli. Suku he, ka nolelele olosuke violuali okuti vi linga olohuasi viekolelo loku lingavo vakapiñala kusoma a likuminya oku eca kuava vo sole?

⁶ Ene puãi, wa lavisi olosuke. Olohuasi hẽ, havioko viu kangaisi? havioko viu tuali kakanga?

⁷ Havioko vi tukola letonãi onduko yiwa wa lukiwi layo?

⁸ Nda vu pokola kocihandeleko cusoma, ndeci ca popia ovisonehua cokuti, Sola ukuẽle ndomo o lisole ove muẽle, vu linga ciwa.

⁹ Puãi, nda vu kuatela omanu ocame, wa lingi ekandu, kuenje vu pisiwa lovihandeleko nda vakuakusina.

¹⁰ Momo u wa pokola kovihandeleko viosi puãi wa lueyapo cimosi, wa pia la viosi.

¹¹ Momo u wa popia hati, Ku ka pekelise, haeye wa popiavo hati, Ku ka ponde. Oco, nda kua pekelisile puãi wa ponda, wa lueya ovihandeleko.

¹² Cene oku popia popia loku lingainga ndava va tetuluiwa noke locihandeleko cina ceca umãmãle.

¹³ Momo, u ka kala kala lohenda ka tetuluiwa lohenda, haimo lumue ohenda yi yula vekanga.

¹⁴ A vamanji, ci silivila ndati, nda omunu o linga hati, Ndukuekolelo, osimbu ka kuete ovilinga vi lekisa ekolelo. Ekolelo liaye nga li tẽla oku u popela?

¹⁵ Nda ukuẽle, ci kale ulume, ci kale ukãi, o kasi lepẽle haeye wa suka okulia kueteke keteke,

¹⁶ kuenje nda umue pokati kene o popia lavo hati, Endi lombembua. Lisikĩlĩli. Kuti, puãi ka va iha ovina via sesamela etimba, ci silivila nye?

¹⁷ Haico ekolelo, nda ka li kuete ovilinga, lia fa muẽle.

¹⁸ Puãi, umue o popia hati, Ove o kuete ekolelo, ame ñuete ovilinga. Ndekise ekolelo liove ka li kuete ovilinga, kuenje ame, lovilinga viange, hu lekisa ekolelo liange.

¹⁹ Ove o tava okuti kuli Suku umosi lika. Ciwa. Ndaño olodemónio vi ci tavavo, kuenji vi luluma.

²⁰ Aveke, ka ca ku lombolokele hẽ okuti ekolelo ka li kuete ovilinga lia fa?

²¹ Avirahama isietu hẽ, ka tendiwile ndukuesunga mekonda liovilinga, eci a lumba Isake omõlaye ocilumba kutala?

²² Siti, ekolelo liaye lia talavaya pamosi lovilinga viaye, kuenda ovilinga via suisapo ekolelo.

²³ Oco, eci ca popiwa lovisonehua ca linga cocili, cokuti, Avirahama wa kolela Suku kuenje co tendiwila esunga. Kuenje vo tukula vati, Ekamba lia Suku.

²⁴ Vu lete okuti omunu o tendiwa ndukuesunga mekonda liovilinga, mekonda liekolelo lika hacoko.

²⁵ Haicovo, ocipuepue cina Rahava hẽ, ka tendiwile ndukuesunga mekonda liovilinga, eci a yekisa olomunga, kuenje wa vi imba onumbi yonjila yiñi?

²⁶ Momo, ndeci etimba ka li kuete efuimo liomuenyo lia fa, haico ekolelo ka li kuete ovilinga laliovo lia fa.