TIAGO 1 - Embimbiliya - Bíblia Sagrada em Umbundu

¹ Ame ndi Tiago, haime ndukuenje wa Suku kuenda wa Ñala Yesu Kristu, Ndi sonehela apata ekui la a vali a sandoka. Kalungi!

² A vamanji, eci vu nyikiwa lolohali viñi viñi, ci sanjukili,

³ momo wa kũlĩhi okuti, nda ekolelo liene li nyikaiwa, cu kokeli epandi.

⁴ Oco epandi liaco liene li male upange walio, okuti vu kanguka, loku suapo, kuenje lacimue cu kambeli.

⁵ Nda umue pokati kene wa kamba olondunge a pinge ku Suku, u ecaeca komanu vosi ocali, halocikundoko, kuenje vi eciwa kokuaye.

⁶ Puãi a pinge lekolelo, oku tatãla hakoko, momo u o tatãla wa soka ndapuku okalunga a pungua lofela, hao a pekuiwa.

⁷ Omunu waco ka ka kolele okuti,

⁸ omunu ukuavitima vivali, haeye ukuakutatayala volonjila viaye viosi, o tambula cimue ku Ñala.

⁹ Omunu o sule a lipande eci a kemalisua,

¹⁰ lohuasi yi lipande eci yi ketisua, momo uwuka ndoneleho yovusenge.

¹¹ Momo ndeci ekumbi li tunda lowuya kuenje li kukutisa ovisenge, okuti oneleho yi loluka, leposo liayo li nyõleha, haico ohuasi yi sekala pokati kasakalalo aye.

¹² Omunu o pandikisa lohali wa sumũlũha, momo, eci a yula, o tambula ekolowa liomuenyo lina Suku a likuminya oku eca kuava vo sole.

¹³ Umue, nda wa yonjiwa, ka ka popie hati, Nda yonjiwa la Suku, momo Suku ka yonjiwa leci cĩvi, kuenda vali, ka yonji umue.

¹⁴ Puãi omunu omunu o yonjaiwa eci a tambiwa loku kokiwa loloñeyi viaye muẽle.

¹⁵ Oloñeyi, eci vi mina, vi cita ekandu, lekandu, eci li kula, li cita okufa.

¹⁶ A vamanji va soliwa, ko ka kembiwi.

¹⁷ Ocali cosi ciwa longavelo yosi ya kanguka via tunda kilu, ku Isia yovinyi. Kokuaye ka kuli oku pongoloka ndaño okuñualapo ku nena undembo.

¹⁸ Ocipango caye muẽle a tu cita londaka yocili. Wa tu citila okuti tu linga apako atete ovilulikilo viaye.

¹⁹ Eci ci limbuki, a vamanji va soliwa. Omunu omunu a kale lutima woku yevelela, a livale oku popia, a livale konyeño,

²⁰ momo onyeño yomunu ka yi koki esunga Suku a yongola.

²¹ Oco, imbipo evĩho liosi lahuku a kula lonjanga. Tambuli lumbombe ondaka ya kũliwa, haiyo yi tẽla oku popela ovimuenyo viene.

²² Lingi vakuakulinga ondaka, vakuakuyeva lika, haivo va likembisa ño, hacoko.

²³ Momo u o yeva ño ondaka puãi ka yi lingainga, wa lisoka lomunu wa livanjela volumuilo ocipala a citiwa laco,

²⁴ omo o livanjelamo, kuenje enda. Tuli a tunda, ndeci a kala co limba.

²⁵ Puãi, u o vanja vanja sui vocihandeleko ca kanguka, haico ceca umãmãle, kuenje o pandikisa laco okuti ka lingi ukuakuyeva lika loku ivala, o linga puãi ukuakulinga, eye o sumũlũisua lokulingainga kuaye.

²⁶ Nda umue wa soka hati, Ndukuetavo, puãi ka kapi olelia kelimi liaye, kuenje o kembisa utima waye, etavo liomunu waco liesanda.

²⁷ Etavo liocili, hailio lia pua evĩho kovaso a Suku haeye Isia, lieli okuti, oku pasula ovimbumba lolosiwe kolohali viavo, loku lilava keliño lioluali.