SOFONIYA 3 - Embimbiliya - Bíblia Sagrada em Umbundu

¹ Imbo liolonamãlãla, hailio lia vĩhĩsua, hailio liukuaku lingisa omanu! —ngongo yalio!

² Layimue ondaka li yevelela; ka li tava oku lemelĩwa. Ka li kolela Yehova; ka liya ocipepi la Suku yalio.

³ Asongui valio vokati kalio va linga olohosi vi kumbakumba. Olonganji vialio olombinji vi ñuala ñuala koñolosi; lacimue vi ci sila omẽle.

⁴ Ovaprofeto valio vakueyuala, haivo va kamba esunguluko. Ovitunda vialio vi lavaisa evi vi kola; vi pengaisa ovihandeleko.

⁵ Yehova pokati kalio eye ukuesunga; cĩvi ka lingi. Omẽle yosi o molãhaisa esunga liaye; poku ca omẽle ka kambiko; puai ondingãivi ka yi kuete osõi.

⁶ Nda nyõla olofeka; olombonge viavo via kupuka. Ndopa omanu volokololo viavo, okuti lomue o pitapitamo. Ovaimbo avo a linga alunda; ulume lakamue; onungi layimue!

⁷ Nda popele siti, Ka pumbi oku sumbila; o tava pokupokuisa kuange, oco olonjo viavo ka vi ka nyoliwe ndeci ca pangiwile, Puãi va kolisako vali oku vĩhĩsa ovilinga viavo.

⁸ Oco Yehova wa popia hati, Nalamẽli toke keteke mbotokela oku va imbila uvangi. Momo nda panga oku ongolola olofeka loku kongela ovoviali, hã si va sukumũila onyeño yange lokutokota kuayo; Momo oluali luosi lu pia vondalu yonyeño yesepa liange.

⁹ Oco muẽle, kotembo yaco mongolola upopi womanu, ho pui esanda, okuti vosi yavo oco va vilikiya onduko ya Yehova, loku u vumba lutima umuamue.

¹⁰ Tunde poku pitahãla olondui vie Etiopia, ava va likutalaila kokuange, haivo vakuacisupe comanu vange va sanduiwa, va nena ovilumba.

¹¹ Keteke liaco ko kutisua osõi mekonda liovilinga viene, vina wa ndingili lavio usuanji; momo njupa pokati kene omanu vene vakuakulitambela, kuenje ko likapi vali kunene vomunda yange yi kola.

¹² Momo ndi sia pokati kene omanu va likapa kutito, haivo ambombe. Ovo va liyeka konduko ya Yehova.

¹³ Ava va siala vi Isareli ka va lingi cĩvi, ka va popi uhembi; ndaño vomẽla wavo ka mu sangiwa elimi lioku liaña; momo va lisiwa loku pekela ciwa, kuenje lomue o va lingisa usumba.

¹⁴ Imba lesanju, a Mõla a Siono ukãi! Kaluka, a Isareli! Sanjuka, loku lisanja lutima wosi, a Mõla a Yerusalãi ukãi!

¹⁵ Yehova wa ku upa olondakawa pia lavio; wa tundisa ovanyãli vove. Soma ya Isareli, eye Yehova, o kasi vokati kove; uvĩ ko mõli vali.

¹⁶ Keteke liaco ci ka popiwa la Isareli, okuti, Ku ka yokoke, a Siono; ovaka ove ka a ka leñele.

¹⁷ Yehova Suku yene o kasi vokati kove; eye ukuonene woku ku muisa eyulo. O ku sanjukila lonjolela; o ku tumbulula locisola caye; o ku sanjukila loku imba ovisungo

¹⁸ ndeci keteke liofesta. Ndi ku upa enyõlẽho, oco ku lavisua vali.

¹⁹ Tala, kotembo yaco ndi lisokiya lava va ku lingisa. Mopela ovilema loku ongolola ava va hangiwa, kuenje mongolola osõi yavo ha yi lingi esivayo kuenda ekemãlo koluali luosi.

²⁰ Kotembo yaco ndu neni vali kofeka yene, okuti ndu wongololi. Oco muẽle, ndu kemãlisi loku u kokeli esivayo, pokati kolofeka viosi violuali, eci numbulula ipako viene kovaso ene. Oco ca popia Yehova.