SOFONIYA 2 - Embimbiliya - Bíblia Sagrada em Umbundu

¹ Ongolokeli pamosi; yali onjango, afeka ya pua osõi,

² osimbu kuambatiwile ndovisaikiti vi enda lofela; osimbu onyeño ya Yehova ka ya ku wilile, osimbu eteke lionyeño ya Yehova ka lieyile kokuove.

³ Sandi Yehova, ene ambombe vofeka, haene wukuakulinga ovihandeleko viaye. Sandi esunga lokuomboka. Mbi wu wundisiwi keteke lionyeño ya Yehova.

⁴ Momo Gasa li linga elunda; Asikelone li yuka ovingululu. Omanu va Asidode va hangiwa ekumbi pongunji. Ekerone li tukuĩwa.

⁵ Ene alonungi viokolonele viokalunga, haene wu va Kerete, ngongo yene! Ondaka ya Yehova yo pisi, a Kanana, wufeka ya va Filisiti, kuenje ndu nyõli toke ka ku siala ndaño onungi yimosi.

⁶ Love, afeka yokoñẽle yokalunga, o linga ovililo, apa ovangombo va lisaila oviunda viavo, haipo va vi tungaila ovimanga.

⁷ Olofeka viokonẽle yokalunga vi linga ocitumãlo cocisupe cepata lia va Yuda; oku va lisaila oviunda viavo, kuenje volonjo via va Asikilone omo va pekaila koñolosi. Momo Yehova Suku yavo o va ivaluka, ha tumbulula vali ipako viavo.

⁸ Nda yeva okufuangula kua va Moavi kuenda alaviso a va Amoni, ndomo va fuanguila omanu vange, loku litambelela ocisimĩlo coku kuata ofeka yavo.

⁹ Oco, ca popia Yehova Ukualohoka, Suku ya va Isareli, ceci, hati, Ndeci ñasi lomuenyo, Moavi yi soka la Sodoma, va Amoni va kala nda va Gomora. Olofeka viaco vi yuka ovisapa violunyi lovima viomongua, vi linga alunda ka a tungiwa vali. Ocisupe comanu vange ci va punda; ava va supapo komanu vange va va kuata.

¹⁰ Eci oco ci linga onima yavo, yina yi va kokela utuni wavo, momo va tomba omanu va Yehova Ukualohoka, loku lipañela oku va nyõla.

¹¹ Yehova o linga lavo eci ci linga usumba; oco muẽle, a nyõla olosuku viosi violuali, kuenje olofeka viosi viomanu viu kekamẽla, eyi kocitumãlo cayo, eyi kocitumãlo cayo.

¹² Lenevo, wu va Etiopia, wu pondiwi losipata.

¹³ Kuenje õluĩla eka liaye o Norte, ha nyõli Asuria; o lingisa Ninivei elunda; osi yayo yi kukuta ndekango.

¹⁴ Oviunda kuenda ovinyama viosi viovusenge vi pekela vokati kayo. Ohokohoko locisaka vi lala vovaimbo ayo. Ocihungulu ci lilila kolonjanela; ocikuamanga ci lilila kolukuki ndokusasãla kuaco, kuenje evi viavo via tungiwa loviti viocedro vi siala ño kutanya.

¹⁵ Liko, olio imbo lia sanjukile, lia kokele, hailio lia likundakunda vutima, liti, Ame ndi likasilili, u wa lisoka lame ka kuli. Cilo lia nyõlẽha we! lia linga ndati avungu ovinyama viovusenge! U wosi o vinjukako o sika ovilua loku ilika lomuine.