SOFONIYA 1 - Embimbiliya - Bíblia Sagrada em Umbundu

¹ Ondaka ya Yehova yeya ku Sofoniya, omõla a Kusi, omõla a Gedaliya, omõla a Amariya, omõla a Hesekiya, kovava a Yosiya, omõla a Amone, Soma yava Yuda.

² Ñomba pe cosi cokilu lieve. Oco ca popia Yehova.

³ Njupapo omunu locinyama; njupapo olonjila viovilu; kuenda olõsi viovokalunga. Njupapovo ovilondokua okuti olondingaĩvi. Njupa omanu kilu lieve. Oco ca popia Yehova.

⁴ Ngoluila Yuda eka liange kuenda olonungi viosi via Yerusalãi. Nyõla kocitumalo cilo ocisupe ca Baale kuenda onduko yovitunda vi fendaila oviteka,

⁵ vana okuti kovailu olonjo va kekamẽla olombungululu viokilu; va kekamẽla Yehova loku lisila laye, puãi haimo va lisilavo la Milikome.

⁶ Va tinduka koku kuama Yehova; ka vo sandi vali pamue oku u pula.

⁷ Uhĩli kovaso a Yehova Suku, momo eteke lia Yehova li li ocipepi. Yehova wa yala ofesta yovilumba; wa laleka ale akombe vaco.

⁸ Kuenje keteke liaco liovilumba via Yehova ame njambula olombuale lomãla va Soma, kuenda vosi ava va liposuisa luwalo wolofeka viñi.

⁹ Keteke liaco ndi yambula u wosi o somboka volukuki, kuenda ava va yukaisa onjo ya cime cavo levi via kuatiwa lundululu luhembi.

¹⁰ Yehova wa popia hati, Keteke liaco ku yevala ondaka yuteto yi tunda kombundi yolõsi, kuenda okuliyula ku tunda konepa yavali yimbo; koviwulu ku tunda onjuvungo ya lua.

¹¹ Alonungi via Makatesi, liyuli, momo ovafũli vosi va nyõlẽha; vakuakupesalisa opalata va tepiwako.

¹² Kotembo yaco ñulĩhĩsa Yerusalãi lolondiyelo, kuenje njambula ava va tumãla ño konasi yavo, vana va likundakunda lovitima viavo vati, Yehova ka lingi ciwa, cĩvi ka ci lingivo.

¹³ Oco ipako viavo vi pundiwa, lolonjo viavo vi linga ovingululu. Ndaño va tunga olonjo ka va kalamo. Va tuika oviumbo viayuva, puãi ka va nyui kovinyu viaco.

¹⁴ Eteke linene lia Yehova li li ocipepi; li li ocipepi muẽle, lia yayulako, Onjuvungo yeteke lia Yehova yi koka usumba; ndaño onoi yi liyula lusumba.

¹⁵ Eteke liaco eteke lionyeño, eteke liesakalalo lohali, eteke lienyõlẽho lohulunguta, eteke liowelema loluvumbulu, eteke liovalende lowelema wa lua,

¹⁶ eteke liolumbeta, kuenda evilikiyo lioku yakisa ovaimbo a pama kuenda olombonge.

¹⁷ Ndi nenela omanu vosi esakalalo, okuti va enda loku papata ndolomeke, momo va lueyela Yehova Osonde yavo yi peseka ndoneketela, ositu yavo ndaniña.

¹⁸ Ndaño opalata yavo ndaño ulu wavo ka vi tẽla oku va popela keteke liaco lionyeño ya Yehova. Vondalu yonyeño yesepa liaye oluali luosi lu pia, momo imũla pe ocipikipiki olonungi viosi violuali.