SAKARIYA 8 - Embimbiliya - Bíblia Sagrada em Umbundu

¹ Ondaka ya Yehova Ukualohoka yeya kokuange, yiti,

² Ca popia Yehova Ukualohoka ceci, hati, Nda sakalala muẽle oku sokolola Siono. Ñasi loku u wivaluka muẽle loku temẽla calua eci co lingiwila.

³ Yehova hati, Niukila ko Siono. Numãla vokati ka Yerusalãi. Kuenje Yerusalãi yi tukuiwa Imbo liesunga, lomunda ya Yehova Ukualohoka yi tukuiwa Omunda yi kola.

⁴ Ca popia Yehova Ukualohoka ceci, hati, Akongo lolohulukãi va tumãla vali vovila via Yerusalãi. Omunu lomunu o kala lombueti yaye peka momo va kuka ca lua.

⁵ Volokololo vimbo mu yuka otuakuenje lotuafeko tu papalelamo.

⁶ Ca popia Yehova Ukualohoka ceci, hati, Eci, nda ci linga ocikomo komanu vakualoneke vilo ava va supapo, ame hẽ, ci lingavo ocikomo kokuange? Oco ca pula Yehova Ukualohoka.

⁷ Ca popia Yehova Ukualohoka ceci, hati, Tala! Mopela omanu vange. Ndi vopa kofeka yokutundilo lokofeka yokutakelo.

⁸ Ndi va nena ko Yerusalãi kuenje va tungamo. Ovo va linga omanu vange lame ndinga Suku yavo locili lesunga.

⁹ Ca popia Yehova Ukualohoka ceci, hati, Ene vu kasi loku yeva yeva oloneke vilo olondaka evi kovimẽla viovaprofeto, vu kasi loku vi yeva yeva muẽle tunde keteke ociseveto conjo ya Yehova Ukualohoka ca sevetiwa okuti onembele yi tungiwa,— Ene muẽle, ovaka ene a pame!

¹⁰ Momo konyima yoloneke evi ka kua kaile ofeto, ndaño yupange womunu, ndaño wocinyama. Ndaño poku iñila pamue poku tunda omanu va kala lohele yalua mekonda liovanyãli. Momo ame nda kapa uyaki vovitima viomanu ha va liyaki, omunu lokuavo, omunu lokuavo.

¹¹ Cilo puãi, si lingi locisupe comanu ava ndeti ndeci nda lingile koloneke viokonyima. Oco ca popia Yehova Ukualohoka.

¹² Momo mbuaya ombembua loku salala. Uyuva wima epako liawo losi yeca ovaima ayo. Kovailu ku loka owume. Kuenje muisa ocisupe comanu ava ovina evi viosi.

¹³ Apata lia Yuda! Apata lia Isareli! Ndeci wa kaili ocisetahãi cesiñalo pokati ka vakualofeka, hacoko vali. Ndu popeli kuenje vu lingi ocisetahãi cesumulũho. Oco, ko ka kali lusumba! Kolisiko! Ovaka ene a pame!

¹⁴ Momo Yehova Ukualohoka wa popia hati, Ndeci nda simile oku u lingi cĩvi eci olosekulu viene via ñokelele onyeño kuenje sia litiuwilemo,— oco ca popia Yehova Ukualohoka,—

¹⁵ haico oloneke vilo nda sima oku linga ciwa la Yerusalãi lepata lia Yuda. Ko ka kuati usumba.

¹⁶ Ovina vu linga vievi, Popi ocili omunu lokuavo. Tetuluili omanu lesunga lombembua kolombundi viene.

¹⁷ Ko ka sokololi vovitima viene cimue cĩvi oku ci linga vakuẽle. Ko ka imbaimbi uvangi wuhembi. Momo ovina evi viosi ndi vi suvuka. Oco ca popia Yehova.

¹⁸ Ondaka ya Yehova Ukualohoka yeya kokuange, yiti,

¹⁹ Ca popia Yehova Ukualohoka ceci, hati, Olotembo vioku likandangiya okulia kosãi yakuãla, leyi yatãlo, leyi yepanduvali, kuenda eyi yekũi, vi linge olotembo viesanju lonjolela kepata lia Yuda. Vi linge muẽle olofesta viesanju. Oco, soli esunga lombembua.

²⁰ Ca popia Yehova Ukualohoka ceci, hati, Ciya okuti omanu veya muẽle, ndaño olonungi viovovaimbo alua.

²¹ Vakuimbo eli va enda ku vakuimbo likuavo, vati, Tuendi lombili oku likutilila ku Yehova loku sanda Yehova Ukualohoka. Ame ngenda. Ngenda muẽle.

²² Vakuapata alua kuenda vakualofeka via pama veya oku sanda Yehova Ukualohoka vo Yerusalãi loku likutilila ku Yehova.

²³ Ca popia Yehova Ukualohoka ceci, hati, Voloneke viaco alume ekũi va tunda kolofeka vialimi osi. Va kuata konanga yu Yuda umosi, vati, Tuenda love, momo tua yeva okuti Suku o kasi lene.