SAKARIYA 7 - Embimbiliya - Bíblia Sagrada em Umbundu

¹ Kulima wakuãla wa Soma Dáriu, keteke liakuãla liosãi yecea, ondaka ya Yehova yeya ku Sakariya ko Kiseleu.

² Ca kala okuti va Betele va tuma Seresene la Regemeleke lalume vavo oku likutilila ku Yehova loku u pinga ohenda.

³ Va tumavo oku pula kovitunda via kala vonjo ya Yehova lokovaprofeto, vati, Ca sesamẽla oku lila loku likandangiya okulia kosãi yatãlo ndeci ndingainga ale alima alua, ale?

⁴ Oco ondaka ya Yehova Ukualohoka yeya kokuange, yiti,

⁵ Popia lomanu vosi vakuafeka yilo kuenda ovitunda, huti, Eci wa likandangiyi okulia loku lila kosãi yatãlo kuenda kosãi yepanduvali pokati kalima aco akũi epanduvali ame nga, ame muẽle, wa liñandangiyili okulia?

⁶ Kuenda eci wu lia leci wu nyua, ko li hẽ loku nyua loku lisokolola ene muẽle?

⁷ Eci Yerusalãi ya kaile lomanu kuenda ya kaile lombembua, kumosi lovikanjo via yi ñuala, leci vofeka yokombuelo leyi yanyala mua tungile omanu, olondaka evi havioko Yehova a popia lovimẽla viovaprofeto vatete?

⁸ Ondaka ya Yehova yeya ku Sakariya, yit.

⁹ Ca popia Yehova Ukualohoka ceci, hati, Tetululi lesunga locili. Likuateli ohenda locikembe omunu lokuavo.

¹⁰ Ko ka pundi ovimbumba lolosiwe, ndaño ukombe pamue ohũkũi. Ko ka sokololi vovitima viene oku linga cĩvi vakuẽle.

¹¹ Ovo puãi ka va tavele oku yeva. Va imba onyima. Va sitika ovatũi avo okuti ka va yevi.

¹² Oco muẽle, va tilĩsa ovitima viavo ndewe okuti ka va yevi ocihandeleko ndaño olondaka via Yehova Ukualohoka vina a tuma le Espiritu liaye lovimẽla viovaprofeto vatete. Oco kueyilila onyeño yalua ya Yehova.

¹³ Ndeci ame nda vilikiya, ovo puãi ka va yevele, haico ovo va vilikiya kuenje ame sia yevele. Oco ca popia Yehova Ukualohoka.

¹⁴ Nda va sandula lehunguhungu pokati kolofeka viosi vina ka va kũlĩhĩle. Oco ofeka ya siala upolokoso okuti lomue o pitamo vali. Ofeka ya posoka ya linga ekalasoko.