SAKARIYA 5 - Embimbiliya - Bíblia Sagrada em Umbundu

¹ Nda petula vali ovaso loku vanja kuenje nda mõla ociña ci telela.

² Eye wa mula hati, O lete nye? Nda kumbulula siti, Ndete ociña ci telela. Usõvĩ waco akũi avali kovikeya. Upati waco ekũi liovikeya.

³ Yu wa popia lame, hati, Eci oco esiñalo li pita vofeka yosi. Momo u wosi iva upiwamo ndeci ca sonẽhĩwako. Lu wosi o lisila lelimbi layevo upiwamo ndeci ca sonẽhĩwako.

⁴ Ame ndi li tuma kuenje liñila vonjo yocimunu kuenda vonjo yu o lisila londuko yange lesanda. Li kala vonjo yaye kuenje li nyõlamo oviti lovawe. Oco ca popia Yehova Ukualohoka.

⁵ Kuenje ungelo wa kala loku vangula lame wamela kokuange. Wa popia lame hati, Petula ovaso. Vanja eci ci kasi loku tunda.

⁶ Nda pula siti, Oco nye? Wa kumbulula hati, Eci ci kasi loku tunda oco onjongo yefa. Wamisako vali, hati, Oyo ocilai colohõle vi kasi vofeka yosi.

⁷ Kuenje tala! Kua tuvuiwa onuviko yosumbu kuenje vonjongo yaco mua tumãla ukãi.

⁸ Ungelo wa kala loku vangula lame hati, Eye Evĩho. Yu wo sindila vokati konjongo. Wa tuvikako vali lonuviko yosumbu.

⁹ Nda petula ovaso kuenje nda mõla akãi vavali va kasi loku iya. Va kala lavava ndavava epanda kuenje va vakula lavava avo. Va yelula onjongo ha yi kala pokati kongongo lilu.

¹⁰ Oco nda pula ungelo wa kala loku vangula lame, siti, Va ka tuala pi onjongo?

¹¹ Eye wa ñumbulula hati, Va ka yi tungila onjo vofeka ya Sinare. Eci onjo yaco yi pua va tumbika onjongo kocitumãlo cayo.