SAKARIYA 4 - Embimbiliya - Bíblia Sagrada em Umbundu

¹ Ungelo wa kala loku vangula lame weya vali, wa masula ndomunu wa pasuiwa kotulo.

² Yu wa mula hati, O lete nye? Nda kumbulula siti, Ndete ondiyelo yulu. Ondiyelo yaco yi kuete ovimẽla epanduvali. Kilu kuli ombia omu mu kala ulela. Vombia yaco mu tunda oviyengo epanduvali vi pitisa ulela kovimela epanduvali viondiyelo.

³ Kolonele viombia kuli oviti vivali violiveira, ukuavo kondio, ukuavo kepĩli.

⁴ Nda pula ungelo wa kala loku vangula lame, siti, A Ñala yange, oco nye?

⁵ Oco ungelo wa kala loku vangula lame wa ñumbulula hati, Eci ka ca ku lombolokele puãi? Nda popia siti, Oco, ka ca ndombolokele.

⁶ Oco wa popia lame hati, Ondaka ya Yehova ku Seruvavele yeyi, hati, Halokuyakako, pamue lunene, te le Espiritu liange. Oco ca popia Yehova Ukualohoka.

⁷ Ove nye, a Munda yinene? Seruvavele o ku lingisa etapi. Eye o kapako ewe lievindi. Kuenje omanu va imba olopandu, vati, Ciwa! Ciwa muẽle!

⁸ Ondaka ya Yehova yeya vali kokuange, yiti,

⁹ Ovaka a Seruvavele a seveta onjo yilo, lovaka aye hao a yi malusula. Kuenje vu kũlĩha okuti Yehova Ukualohoka wa numa kokuene.

¹⁰ Momo wosi wa pembula eteke liovina vitito o yolela, kuenje o mõla opulumu peka lia Seruvavele. Epanduvali liaco o-o ovaso a Yehova, ana a ñuala ñuala koluali luosi.

¹¹ Nda popia vali laye, siti, Oviti vivali violiveira vina via kala, ukuavo kondio, ukuavo kepĩli liondiyelo, ovio ovilai via nye?

¹² Ndo pula vali onjanja yavali, siti, Ovianja viaco vivali violiveira vi kasi ocipepi loviyengo viaco vivali viulu vi pitisa ulela, ovio nye?

¹³ Eye wa mula hati, Ka ca ku lombolokele puãi? Nda kumbulula siti, Oco, a Ñala yange, ka ca ndombolokele.

¹⁴ Oco wa ndomboluila hati, Ovio olombuavekua vivali vi kasi kovaso a Muẽleangongo yosi.