SAKARIYA 3 - Embimbiliya - Bíblia Sagrada em Umbundu

¹ Noke wa ndekisa Yehosua, ocitunda cinene, wa talama kovaso yungelo wa Yehova. Satana wa talama kondio yaye oku u pindika.

² Yehova wa popia la Satana hati, Yehova a ku lemẽle, a Satana! Yehova, u wa nola Yerusalãi, a ku lemẽle! Heyeko ocitonga copiwa vondalu?

³ Yehosua wa talama kovaso yungelo, wa wala uwalo wa liña.

⁴ Ungelo wa popia lava va kala laye, hati, U luli uwalo waye wa liña. Wa popia laye muẽle, Yehosua, hati, Nda ku upa olohole viove kuenje hu walisa uwalo wa fina.

⁵ Nda popia siti, Va kape ekofue li yela kutue waye. Oco va kapa ekofue li yela kutue waye loku u walisa. Ungelo wa Yehova wa talamako.

⁶ Kuenje ungelo wa Yehova wa popia la Yehosua, wo sapuila hati,

⁷ Ca popia Yehova Ukualohoka ceci, hati, Nda wendela volonjila viange loku pokola kovihandeleko viange oco o viala onjo yange loku tata ovitali viange, kuenje hu ĩha omangu pokati kava va tãi kulo.

⁸ Oco, a Yehosua! Acitunda cinene! —yevelela! Momo ove muẽle lavakuẽle va tumãla love kulo, vosi yene, ndu kueteli elavoko. Tala! Mañinya ukuenje wange, Cinjovelela, kuenje iya.

⁹ Momo tala! Nda tumbikila Yehosua ewe. Lewe liaco limosi li kuete avindi epanduvali. Ame sonẽhãko ondimbukiso yalio. Oco ca popia Yehova Ukualohoka. Kuenje njupa evĩho vofeka yilo veteke liongongo.

¹⁰ Yehova Ukualohoka wa popia vali, hati, Keteke liaco omunu omunu o pañinya ukuavo ha tumãla laye vemẽhi liuti waye wayuva pamue wukuyu.