SAKARIYA 2 - Embimbiliya - Bíblia Sagrada em Umbundu

¹ Nda petula vali ovaso loku vanja. Nda mõla omunu o kuete peka ukolo woku seteka.

² Ndo pula siti, Wenda pi? Wa ñumbulula, hati, Ngenda ha seteka Yerusalãi loku kũlĩhisa upati wayo lusõvĩ wayo.

³ Ungelo wa kala loku vangula lame wamẽla kokuange kuenje ungelo ukuavo weya, wa ñualẽhẽla laye.

⁴ Wa popia laye, hati, Lupuka! Ka sapuile umãlẽhe o, huti, Yerusalãi yi tungiwa ndovaimbo ka a kuete ovimbaka mekonda liowiñi walua womanu lovinyama u kalamo.

⁵ Momo ame muẽle ndi yi lingila ocimbaka condalu ci yi ñuala, haime ndinga ulamba vokati kayo. Oco ca popia Yehova.

⁶ Yehova wa popia hati, Ewa! Tundi kofeka yoko Norte momo ame ndu wongololi kolonẽle viosi violuali. Oco ca popia Yehova.

⁷ Ene wa tungi vofeka ya Bavulono, tilili ko Siono.

⁸ Momo eci ulamba waye wa numa ame kolofeka via ku punda,— momo kokuaye, nda umue wa ku lamba ove ca soka okuti wa lamba komoliso liaye,— oco Yehova Ukualohoka wa popia hati,

⁹ Tala! Vakualofeka vo pundi ndi võluĩla eka liange kuenje va pundiwa lava va pundiwile lavo. Oco vu kũlĩha okuti Yehova Ukualohoka wa numa.

¹⁰ Sanjuka! Yolela, amõla a Siono ukãi! Momo njiya, nunga vokati kove. Oco ca popia Yehova.

¹¹ Eteke liaco vakualofeka via lua vongolokela ku Yehova. Va linga omanu vange kuenje ame numãla vokati kove.

¹² Love o kũlĩha okuti Yehova Ukualohoka wa numa kokuove. Kuenje Yehova o tambula Yuda ndocipiñalo caye vofeka yi kola, haeye o nola vali Yerusalãi.

¹³ Ene vosi wakuasitu, uhĩli kovaso a Yehova, momo wa pasuka vocitumãlo caye ci kola.