SAKARIYA 14 - Embimbiliya - Bíblia Sagrada em Umbundu

¹ Tala! Eteke lia Yehova liya! Kuenje keteke liaco ovina va ku punda vi tepelua muẽle vokati kove.

² Momo ngongolola olofeka viosi ha viya oku yaka la Yerusalãi. Kuenje imbo li kuatiwa, lolonjo vi pundiwa, lakãi vaco va vĩhĩsua. Onepa yomanu valio yi tualiwa kumandekua, puãi ava va supapo ka vopiwa vimbo.

³ Noke Yehova o tunda ha yaki lolofeka viaco ndeci a tuwa oku yaka keteke liovita.

⁴ Keteke liaco olomai viaye vi talama komunda ya Oliveira, yina yi lisungue la Yerusalãi konẽle yutundilo. Omunda ya Oliveira yi toka pokati. Pokati konẽle yokutundilo lonẽle yokutakelo pa kala omuva yinene, ndokuti onẽle yikuavo yomunda yamẽla ko Norte, yikuavo yamẽla ko Sul.

⁵ Kuenje omuva yolomunda viange yi sitikiwa, momo omuva yolomunda yi pitila toke konẽle yayo muẽle. Kuenje ene muẽle vu tila ndeci wa tilili ondindimo kovava a Usiya, osoma ya Yuda. Noke Yehova, Suku yove, iya kumue lava vosi va kola.

⁶ Keteke liaco ka ku kala ombambi pamue ocikokoto.

⁷ Eteke liaco lia kũlihiwa la Yehova. Li kala locinyi ka cimi. Ka li kala lutanya luteke momo ndaño koñolosi ku kala ocinyi.

⁸ Keteke liaco ovava omuenyo a tunda ko Yerusalãi. Onẽle yiñila vokalunga kokutundilo, onẽle vokalunga kokutakelo. Kuenje a pita kondombo lokokuenye.

⁹ Kuenje Yehova o linga osoma yoluali luosi. Keteke liaco Yehova o linga umuamue londuko yimuamue.

¹⁰ Ofeka yosi yi linga etapi tunde ko Geva toke ko Rimone, kombuelo yoko Yerusalãi. Yerusalãi puãi lopo yi tumũha kocitungilo cayo tunde kombundi ya Benjamini toke pana pa kaile ombundi yale, kuenda tunde kombundi yokevindi toke kombonge ya Hanavele, okuti kovikamẽlo via Soma.

¹¹ Kuenje imbo li tungiwa, momo ka ku kala vali esiñalo. Vo Yerusalãi mu kala omanu kuenje va koka.

¹² Kuenje efengi lia Yehova lina a vela lalio vakualofeka viosi vi yakisa Yerusalãi, lieli: Ositu yavo yi vola osimbu va tãi vilu. Ovaso avo a volela vitunu viaco. Alimi avo la-ovo a volela vimẽla.

¹³ Keteke liaco Yehova o va yokokisa ca lua, cokuti va likuata kuata, omunu lokuavo, omunu lokuavo, ha va liyaki.

¹⁴ Ndaño Yuda yi yakisa Yerusalãi. Kuenje ukuasi wolofeka viosi vi sungueko wongoluiwa, lulu lopalata kuenda oviwalo via lua.

¹⁵ Kuenje efengi nda lina li veta omanu li vetavo otuvalu, lolomula, lolongamelo, lovimbulu, kuenda ovinyama viosi vi sangiwa kovilombo viaco.

¹⁶ Kotembo yaco u wosi wa supapo ku vakualofeka, vina via yakisile Yerusalãi, ulima kulima endaenda oku fendela Osoma yinene, Yehova Ukualohoka, loku kala kofesta yolosinge.

¹⁷ Kuenje nda ku kala amue apata okolofeka ka a endi ko Yerusalãi oku fendela Osoma Yehova Ukualohoka, kofeka yavo ka ku loki ombela.

¹⁸ Nda epata lia va Egito ka li endi oku lilekisa, oco kokuavo ku veta efengi lina Yehova a veta lalio olofeka viosi ka vi endi oku kala kofesta yolosinge.

¹⁹ Eli olio eyambulo lia ve Egito, hailio eyambulo liolofeka viosi ka vi endi oku kala kofesta yolosinge.

²⁰ Kuenje keteke liaco kolongenjo viotuvalu ku sonẽhiwa ondaka eyi, Tu kola ku Yehova. Ndaño olombia viovonjo ya Yehova vi soka ndatiyela okovaso yutala.

²¹ Kuenje olombia viosi vi li vo Yerusalãi lovo Yuda vi kola ku Yehova Ukualohoka, okuti vosi veya oku lumba va tẽla oku iya ha va vi nyañula loku telekamo ositu yovilumba. Kuenje keteke liaco ka mu kala vali ukuakufũla vonjo ya Yehova Ukualohoka.