SAKARIYA 12 - Embimbiliya - Bíblia Sagrada em Umbundu

¹ Ondaka eyi ondaka Yehova a popela va Isareli. Yehova U wa yala ilu loku seveta ongongo, haeye wa fuimila omunu omuenyo wa Suku, eye wa popia hati,

² Tala! Ndopo ndingisa Yerusalãi ndeci ci vevengisa omanu vosi vo ñuala. Ndaño ko Yuda ciyavo eteke va ñuala Yerusalãi ocingonja.

³ Eteke liaco ndingisa Yerusalãi ewe linene komanu vosi. Vosi va li lituika va nyãnyoha. Vakualofeka viosi vongolokela oku tamãlãla lalio.

⁴ Yehova hati, Eteke liaco njokokisa otuvalu tuosi. Lava va endelako ndi va saluisa uyui. Onjo ya Yuda puãi ndi yi petuila ovaso eci otuvalu tuosi tua vakualofeka ndi tu lingisa olomeke.

⁵ Oco vakuapata a Yuda va likunda lutima vati, Ongusu yolonungi via Yerusalãi yi kasi ku Yehova Suku yavo.

⁶ Eteke liaco ndingisa vakuapata a Yuda ndondalu yovusenge, pamue ndumĩhi kasita. Kondio lokepĩli va nyõla omanu vosi va va ñuala, osimbu Yerusalãi yi kala vali vocitumãlo cayo muẽle, cokuti vo Yerusalãi.

⁷ Kuenje Yehova o livanga oku muisa Yuda eyulo, okuti ulamba wonjo ya Daviti lowu wolonungi via Yerusalãi ka u velipo okuti wa Yuda u sule.

⁸ Keteke liaco Yehova o teyuila olonungi via Yerusalãi lociteyuilo okuti eteke liaco ndaño ava va leñela pokati kavo va linga nda Daviti. Kuenje kokuavo epata lia Daviti li linga nda Suku, pamue ndungelo wa Suku, oku va songuila.

⁹ Kuenje keteke liaco mbotokela oku nyõla vakualofeka viosi veya oku yakisa Yerusalãi.

¹⁰ Ngeca kepata lia Daviti kuenda kolonungi via Yerusalãi utima wohenda kuenda utima woku likutilila, okuti eci va vanja u vo toma vo lilila ndu o lilila omõlaye ongunga. Vo lilila muẽle calua ndu o lilila nuñulu yaye.

¹¹ Keteke liaco ku kala okulila vo Yerusalãi kuenje okulila kuaco ku lua nda kuna koku lilila ko Hadrimone ketapi lia Megido.

¹² Ofeka yosi yi lila, epata epata. Epata lia Daviti li lililila, lakãi vavo va lililila. Lepata lia Natana li lililila, lakãi vaco.

¹³ Epata lia Lewi li lililila, lakãi vaco. Epata lia Simei li lililila, lakãi vaco.

¹⁴ Kuenje apata osi a supapo a lililila, epata epata, lakãi vaco va lililila.