SAKARIYA 11 - Embimbiliya - Bíblia Sagrada em Umbundu

¹ A Levanone, yulula olombundi viove okuti ondalu yi lia ovinendele viove!

² Olemba, lisiõsiõla omo ocinendele ca veyuka, lomo oviti via velapo via nyoleha! Aviti viungolo via Basane, liyuli, momo esisi lia timbuiwa.

³ Yevelela! Hakuliyulako kuovangombo omo ulamba wavo wa nyõlẽha? Yevelela! Hakukomako kuayove olohosi momo ovisitu via Yordao via nyõlẽha!

⁴ Ca popia Yehova Suku yange ceci, hati, Linga ungombo wolomeme via tukuilua okufa.

⁵ Ava va vi landa va vi ponda ño, loku yambuiwa lakamue. Lava va vi landisa va popia, vati, Suku a sivayiwe omo nda limuisa. Kuenje ovangombo vavio muẽle ka va vi kuetele ohenda.

⁶ Momo si kuatela vali ohenda olonungi viofeka yilo. Oco ca popia Yehova. Ndi va eca omunu omunu peka liungombo waye pamue peka liosoma yaye. Va yambula ofeka kuenje si va popela peka liavo.

⁷ Oco nda linga ungombo wolomeme via tukuilua oku fa povaka ava va fũla fũla ño olomeme. Nda nyañula olombueti vivali, yimue nda yi luka Henda, yikuavo Etokekiso. Kuenje nda tata olomeme.

⁸ Vosãi yimosi nda nyõla angombo vaco vatatu. Puãi sia tẽlele vali oku pandikisa lavio. Laviovo via suvuka.

⁹ Oco nda popia siti, Si lingi vali ungombo wene. Eyi yi fa yi fe muẽle. Eyi yi nyõlẽha yi nyõlẽhe ño. Levi vi supapo vi lilie, omeme lomeme yi lie yikuavo.

¹⁰ Oco nda nyañula ombueti yange, Henda, kuenje nda yi teya. Ca lekisa okuti nda imũla ocisila cina nda lisila lomanu vaco vosi.

¹¹ Oco eteke liaco ca imũha muẽle. Kuenje angombo vesanda va fũla fũla ño olomeme, ava va kala loku mbanja, va kũlĩha okuti ondaka yaco ondaka ya Yehova.

¹² Yu nda popia lavo, siti, Nda co sunguluki, nyĩhi ofeto yange. Nda hacoko ci kale ño. Yu va mesalela ofeto yange yokuti akũi atatu kolosiekele viopalata.

¹³ Oco Yehova wa popia lame, hati, Vimba vombango. Ya! ofeto ya posoka va ku sokiyila! Oco nda nyañula opalata yaco yokuti akũi atatu kolosiekele kuenje nda vimba vombango vonjo ya Yehova.

¹⁴ Noke nda teya ombueti yange yavali, yokuti Etokekiso. Ca lekisa okutepiwa kumanji pokati ka Yuda la Isareli.

¹⁵ Yehova wa popia lame, hati, Nyañula vali ovikuata viungombo wesanda.

¹⁶ Momo vofeka mbotola ungombo, kuenje ungombo waco ka sanda evi via nyẽlẽla, ka landula evi vi tuñayala, ka sakula evi vi vela, ndaño oku lisa evi vi ñuai. Puãi o takĩla ositu yevi via neta, ndaño oku teya akonjo avio.

¹⁷ Ungombo wange wesanda o yanduluka ocunda, ngongo yaye. Osipata yi vete okuokuo kuaye liso liaye liondio. Okuokuo kuaye ku siõsie muẽle! Liso liaye liondio ka li ka mõle vali!