SAKARIYA 1 - Embimbiliya - Bíblia Sagrada em Umbundu

¹ Kosãi yecelãla yulima wavali wa Dáriu ondaka ya Yehova yeya kuprofeto Sakariya, omõla a Berekiya, omõla a Ido, yiti,

² Yehova wa temẽla calua olosekulu viene.

³ Oco, popia lavo huti, Ca popia Yehova Ukualohoka ceci, hati, Tiuki kokuange,— oco ca popia Yehova Ukualohoka. Kuenje ame niuka kokuene,— oco ca popia Yehova Ukualohoka.

⁴ Ko ka lingi ndolosekulu viene, vina ovaprofeto vatete va vi vetiyile vati, Ca popia Yehova Ukualohoka ceci, hati, Tinduki kolonjila viene via penga kuenda kovilinga viene vĩvi. Puãi ka va njevele, ndaño oku mokola. Oco ca popia Yehova.

⁵ Olosekulu viene vi kasi pi? Ovaprofeto hẽ, va kala ño-o hũ lomuenyo?

⁶ Olondaka viange lovihandeleko viange, vina nda handeleka lovimẽla viakuenje vange ovaprofeto, ka via lingiwile hẽ kolosekulu viene? Oco ovo va tindukako, vati, Ndeci Yehova Ukualohoka a panga oku linga letu mekonda liolonjila vietu lovilinga vietu oco a tu linga.

⁷ Keteke liakũi avali lakuãla, kosãi yekũi lamosi, okuti osãi ya Sevata, kulima wavali wa Dáriu, ondaka ya Yehova yeya kuprofeto Sakariya omõla a Berekiya, omõla a Ido. Kuenje Sakariya hati,

⁸ Pokati kuteke nda vanja, yu nda mõla omunu wa endela kokavalu ka kusuka. Wa talama pokati koviti viovocimbota. Konyima yaye kua kala otuvalu tu kusuka, lotu tu tekavelua, kuenda otu tu yela.

⁹ Oco nda pula, siti, A Ñala yange, ovo velie? Ungelo wa kala loku vangula lame wa ñumbulula hati, Ame hu va lomboluila.

¹⁰ Oco omunu wa talama pokati koviti wa kumbulula, hati, Ava ovo Yehova a tuma oku ñuala ñuala voluali.

¹¹ Kuenje ovo va kumbulula ungelo wa Yehova o tãi Pokati koviti, vati, Tua ñuala ñuala ale yoluali, kuenje oluali luosi lua tulumũha. Kuo si kuli ombembua.

¹² Oco ungelo wa Yehova wa kumbulula, hati, A Yehova Ukualohoka, eteke lipi wivaluka vali lohenda Yerusalãi lovaimbo a Yuda ana wa a temẽla alima akũi epanduvali?

¹³ Yehova yu wa kumbulula ungelo wa kala loku vangula lame. Wo kumbulula lolondaka viwa haivio vielembeleko.

¹⁴ Oco ungelo wa kala loku vangula lame wa popia lame hati, Vilikiya huti, Ca popia Yehova Ukualohoka ceci, hati, Nda sakalala muẽle oku sokolola Yerusalãi la Siono.

¹⁵ Nda temẽla calua olofeka vi kasi ño, ohele lakamue. Momo ndaño ame nda tema naito haimo ovo va yukinya ohali yaco.

¹⁶ Oco Yehova wa popia hati, Nda tiuka vali lohenda ko Yerusalãi. Onjo yange yi tungiwilamo. Oco ca popia Yehova Ukualohoka. Kuenje ukolo woku seteka u nyanyumuĩwa vali vo Yerusalãi.

¹⁷ Vilikiya vali, huti, Ca popia Yehova Ukualohoka ceci, hati, Ovaimbo ange a salala vali eci ca piãla enene. Yehova o lembeleka vali Siono loku nola Yerusalãi.

¹⁸ Oco nda petula ovaso ange loku vanja kuenje nda mõla olombinga vikuãla.

¹⁹ Nda pula ungelo wa kala loku vangula lame, siti, Evi nye? Eye wa ñumbulula hati, Evi ovio olondimbukiso viovonene a sandula Yuda la Isareli la Yerusalãi.

²⁰ Yehova wa ndekisavo ovivinda vikuãla.

²¹ Nda pula siti, Ovio vieyilila oku linga nye? Wa ñumbulula hati, Olombinga ovio olofeka via sandula Yuda okuti lomue o tẽla oku petula utue. Ovivinda vieyilila oku vi lulumisa loku nyõla oloholo violofeka via katukila ofeka ya Yuda ha vi yi sandula.