RUTI 3 - Embimbiliya - Bíblia Sagrada em Umbundu

¹ Oco ndatembo yaye Naomi wa popia laye hati, Amolange, siu ku sandela hẽ omangu yokuti o kala ciwa?

² Boasi hẽ, una ove wa kala kala lafeko vaye, hangandietuko hẽ? Ota, oñolosi yilo eye o pekula osevata pocimbandi.

³ Oco, lisukula, lisieketa ulela, wala uwalo wove wa velapo. Lokila kocimbandi, puãi ku ka limõlẽhise kulume waco te eye wa mãla oku lia loku nyua.

⁴ Oco, eci a pekela, kũlĩhisa apa a pekelela, noke kuendepo, sikũlũla kolomãi viaye, pekela. Leye o ku sapuila eci o linga.

⁵ Oco Ruti wa kumbulula hati, Cosi o nukuila ndi ci linga.

⁶ Oco Ruti wa lokila kocimbandi, wa linga cosi ndatembo yaye o tukuila.

⁷ Eci Boasi a lia kuenda wa nyua, lutima waye wa sanjuka, oco wa ka pekela konele yesenge liolomema. Kuenje Ruti weya levando, wa sikũlũla kolomãi viaye, wa pekela.

⁸ Oco pokati kuteke ulume wa lisalukako, wa pongoloka, kuenje tala, ukãi wa pekela kolomãi viaye.

⁹ Wo pula hati, Ove hẽ elie? Ukãi wa kumbulula hati, Ame Ruti ndindingupange yove. Sikĩlĩla ondingupange yove lonanga yove, omo ove wungandietu muẽle.

¹⁰ Kuenje Boasi wa popia laye hati. Yehova a ku sumũluise, amõlange. Kesulilo wa linga ohenda ya piãla, yina yokefetikilo yi sule. Omo kua vanjiliyile amalehe, pamue u osuke, ndaño u ohuasi.

¹¹ Kaliye amõlange, ku ka yokoke. Hu lingila cosi o nukuila momo vakuetu vosi vimbo va ku kũliha okuti ove wukãi wocili.

¹² Oco cilo, ocili muẽle ame ndingandiove muẽle. Haimo lumue, ku kasi umue wa miãlapo kunjiwe.

¹³ Kala ño uteke ulo, kuenje omẽle nda eye o tava oku linga love ndonõha yusitue, ciwa, a ci linge muẽle. Puãi nda eye ka tava oku linga love ndonõha yusitue, oco, ndomo Yehova a kasi lomuenyo, ame muẽle ndinga love ndonõha yusitue. Pekela ño toke omẽle.

¹⁴ Oco Ruti wa pekela kolomãi viaye toke omẽle, yu wa pasuka osimbu omunu oku limbukiwa lukuavo ka ca tavele. Omo Boasi hati, Ka ci ka yevale okuti ukãi weyile kocimbandi.

¹⁵ Boasi wa popia la Ruti hati, Nena kulo ocifuto wa lifuta laco, ci nyanyumũla. Oco Ruti wa ci nyanyumũla. Boasi wa yongelapo olonjongo epandu viosevata, kuenje wo tuikako. Oco Ruti wa enda kimbo.

¹⁶ Eci a keya ku ndatembo yaye eye wo pula hati, Ca kala ndati, amõlange? Oco Ruti wo sapuila cosi ulume o lingila,

¹⁷ hati, Wa nyiha olonjongo evi epandu viosevata hati, Ka ci tava oku enda ño upolokoso ku ndatembo yove.

¹⁸ Oco Naomi wa kumbulula, hati, Amõlange, talamẽla toke o limbuka ndeci ci sokiyiwa; momo ulume u ka liwekako, o malusula muẽle ovina evi etaili.