RUTI 2 - Embimbiliya - Bíblia Sagrada em Umbundu

¹ Naomi yu wa kala la umue ngandi a veyaye, eye ohuasi, ukuepata lia Elimeleke, onduko yaye Boasi.

² Ruti u Moavi wa popia la Naomi hati, Ngenda kovapia si nolũlũla pokati kovitungu viu o ñuatela ohenda. Oco wa popia laye hati, Amõlange, kuenda ño.

³ Oco wa tunda, wa enda, wa nolũlũla vepia vonyima yava va kala loku ungula. Ca veta okuti weya konepa yepia yina ya tiama ku Boasi, haeye ukuepata lia Elimeleke.

⁴ Kuenje ota, Boasi u Beteleme wa popia lavakuakuungula hati, Yehova a kale lene. Ovo vo kumbulula vati, Yehova a ku sumũluise.

⁵ Oco Boasi yu wa pula usongui wa vakuakuungula hati, Ufeko u hẽ welie?

⁶ Kuenje usongui wa vakuakuungula wa kumbulula hati, Ufeko o eye u Moavi una weya la Naomi, wa tunda kofeka ya Moavi.

⁷ Eye wa minga nda ci tava oku nolũlũla pokati kovitungu vonyima yavakuakuungula. Oco weya, wa talavaya ño-o tunde omẽle toke cilo, loku puyuka ka puyukile ndaño naito.

⁸ Oco Boasi wa popia la Ruti hati, Yevelela amõlange. Ku ka endaende kepia limue liñi oku ka nolũlũla. Vepia lilo ku ka tundemo. Puãi kala ño ocipepi lafeko vange.

⁹ Ovaso ove a vanje vepia omo va kasi loku ungula, kuenje va kuama. Sia handelekele hẽ akuenje okuti ka va ku lambi? Eci o kala lenyona kuende kovikuata, ka nyue ovava akuenje va tapa.

¹⁰ Oco Ruti wa petamela posi, wa lituvikapo, yu wa linga hati, Ci kasi ndati okuti nda sanga ohenda kokuove? Nye wa ndingila ame ohenda, ame hame ndukualofeka?

¹¹ Boasi puãi wo kumbulula hati, Cosi wa lingila ndatembo yove tunde veyaye a fa va ci sapuila, ndeci wa sia so la nyoho lofeka oko wa citilua yu weya komanu kua kulĩhĩle.

¹² Yehova a ku muise onima ya soka lupange wove; onima yocili yu kuihiwe la Yehova Suku ya Isareli una ove weya oku vunda vavava aye.

¹³ Oco aye wa linga hati, A cime cange, wa ndingila cimue ca piãla, omo wa ndembeleka, kuenda wa vangula lufeko wove lohenda, ndaño si kasi muẽle ndufeko wove.

¹⁴ Kuenje kotembo yokulia Boasi wa popia laye hati, Enju kulo, liako okambolo, yava okambu kove vovinyu. Oco Ruti wa tumãla kumosi la vakuakuungula; yu Boasi wo wihãko okalukango, Ruti wa lia toke wa tẽla, kuenje wa siapo.

¹⁵ Eci a votoka oku nolũlũla, oco Boasi wa sapuila akuenje vaye hati, A nolũle ovisangu, ko ko lemẽli.

¹⁶ U somuilivo vimue kovitungu, endi loku viusilako, oco eye a vi nolũlũle. Ko ko lemẽli.

¹⁷ Oco Ruti wa nolũlũla vepia toke kekumbi, yu wa sasa eci a nolũlũla, kuenje ca soka lefa limosi liosevata.

¹⁸ Oco wa ci yelula, wa enda kimbo, wa lekisa ku ndatembo yaye eci a nololũile. Wa nenavo okulia kuna a silepo eci a lia, kuenje wo wiha.

¹⁹ Ndatembo yaye yu wo pula hati, Etaili hẽ, wa ka nololuile pi? Wa ka talavayele pi? U wa ku limbuka a sumulũhe. Ruti wa sapuila ndatembo yaye ku a ka talavayele, hati, Onduko yulume oku nda ka talavayele etaili, Boasi.

²⁰ Oco Naomi wa popia la ndatembo yaye hati, Suku o sumũluise omo ohenda yaye ya lua. Ohenda yaye ka ya yandulukile ava va kasi lomuenyo ndaño ava va fa. Naomi wa popia vali hati, Ulume waco o-o ngandietu muẽle, ukuositue wetu muẽle.

²¹ Oco Ruti u Moavi hati, Kuenda vali, wa popia lame hati, Kala lafeko vange toke va malusula oku ungula kuange kuosi.

²² Oco Naomi wa popia la ndatembo yaye Ruti hati, Amõlange, ciwa nda wendaenda lafeko vaye sanga vepia likuavo o tondaliwa.

²³ Oco Ruti wa kala kala lafeko va Boasi ha nolũlũla toke apa pa puila oku ungula osevata kuenda otiliku. Wa kala vonjo yimosi la ndatembo yaye.