RUTI 1 - Embimbiliya - Bíblia Sagrada em Umbundu

¹ Koloneke viokuviala kuolonganji vofeka mueya onjala. Kuenje ulume umue u Beteleme-Yuda wa enda oku ka tunga vofeka ya Moavi, eye lukãi waye kuenda omãla vaye vavali valume.

² Onduko yulume waco Elimeleke; onduko yukãi waye eye Naomi; olonduko viomãla vaye vavali valume, Maheloni la Kiliyone; vimbo liavo ve Efarata lia Beteleme-Yuda. Ovo va enda kofeka ya Moavi, oko va tunga.

³ Puãi Elimeleke, veya a Naomi, wa fa; eye ukãi wa siala lomãla vaye vavali valume.

⁴ Ovo va kuela akãi va Moavi, onduko yumue ukãi eye Arape; onduko yukuavo eye Ruti. Va kalako ekui lianyamo.

⁵ Maheloni la Kiliyone va fa, kavali kavo, okuti ukãi wa nyehiwa omãla vaye vavali valume kuenda veyaye.

⁶ Oco Naomi wa votoka la vandatembo vaye vakãi oku tunda kofeka ya Moavi, omo a yevela vofeka ya Moavi okuti Yehova wa ivaluka omanu vaye vo ko Beteleme-Yuda yu wa ĩha okulia.

⁷ Oco eye wa tunda kimbo oku a kala lavandatembo yaye, kuenje va wila vonjila yoku tiukila kofeka ya Yuda.

⁸ Naomi yu wa popia la vandatembo yaye vavali hati, Kuendi tiukili, omunu omunu a tiukile konjo ya inaye. Yehova o lingi ohenda ndeyi wa lingili ene kuava va fa, leyi wa ndingili ame.

⁹ Yehova o muisi olonjo kavali kene, u onjo yaye lulume waye, u onjo yaye lulume waye. Oco wa va sipula, kuenje ovo va kaluka loku lila.

¹⁰ Va popia laye vati, Oco hacoko, Tu enda love ku vangandiove.

¹¹ Oco Naomi wa linga hati, Tiukili ño, amãla vange. Wendeli nye lame? Ame hẽ, ñuete vali vimo omãla valume okuti va linga vaveyene?

¹² Tiukili ño, amala vange, endi lonjila yene, omo nda kuka enene, oku kuela vali si ci tẽla. Nda nda popele ño siti, Ñuete elavoko, ndaño nda kala la veyange uteke ulo si citi omãla valume,

¹³ ene hẽ, nda wa va talameli toke va kula?— nda wa likandangiyi oku kuela? Oco hacoko amãla vange. Oku u sokololi coku mbala ca lua ndomo eka lia Yehova lia mbeta.

¹⁴ Oco va lila vali kuenje Arape wa sipula ndatembo yaye; Ruti puãi wo lamẽlela.

¹⁵ Oco Naomi wa popia hati, Ota, huvove wa tiukila kuvangandiaye kuenda kolosuku viaye. Lovevo, kuama huvove.

¹⁶ Ruti puãi wa popia hati, Ku ka milike oku ku tunda hã si liweka oku ku kuama, momo oku wenda lamevo haiko ngenda, oku o ka sikila haiko ha sikilavo. Omanu vove va linga omanu vange, Suku yene o lingavo Suku yange;

¹⁷ oku o fila lamevo haiko fila, haiko muẽle ñendiwa. Yehova a ci niuwile loku vandekako vali nda hakufako lika ku nepisa love.

¹⁸ Eci Naomi a limbuka okuti wa likapelako muẽle oku enda laye oco ka popele vali cimue.

¹⁹ Oco kavali kavo va enda ño toke va pitila ko Beteleme. Eci va pitila ko Beteleme oco imbo liosi lia va yolela. Akãi va pula vati, U hẽ Naomi ale?

²⁰ Kuenje eye wa popia lavo hati, Ko ka nukuli vali Naomi yokuti Esanju, nukuli Mara yokuti Cilula momo Tõlo wa ndingila evi vi lula enene.

²¹ Eci nda tundile kulo ndekuta, cilo Yehova wa niula upolokoso. Nye hẽ vu nukuili hoti, Naomi, osimbu Yehova wa misa, kuenje Tõlo wa suvalisa?

²² Oco Naomi wa tiuka, weya la Ruti u Moavi, ndatembo yaye, haeye o tunda kofeka ya Moavi. Veya ko Beteleme. Veya kefetikilo liotembo yoku ungula osevata.