OVISILA 9 - Embimbiliya - Bíblia Sagrada em Umbundu

¹ Ono noke keteke liecelãla Mose wa pañinya Arone kuenda omãla vaye valume lakulu va Isareli.

² Wa popia la Arone hati, Likuatela okanale kocunda ocilumba cekandu, locitupi cocilumba coku pia elisi. Nola evi ka vi kuete etondelo, vi nena ku Yehova.

³ Oco popia la va Isareli huti, Likuatẽli ocitupi cohombo cocilumba cekandu kuenda okanale lokameme kunyamo umosi. Nola evi ka vi kuete etondelo, ndocilumba coku pia elisi.

⁴ Longombe locitupi comeme vi linga ovilumba viombembua oku lumbila Yehova kuenda ocilumba cosema ca tengiwa lulela.

⁵ Oco va nena kovaso yombalaka yoku ñualehela la Yehova evi via tukula Mose, kuenje owiñi wosi wa kokela ho talama kovaso a Yehova.

⁶ Mose yu wa linga hati, Ocina eci oco ca sapula Yehova okuti vu ci linga, oco ulamba wa Yehova u tukulukila kokuene.

⁷ Oco Mose wa popia la Arone hati, Amẽla kutala. Lumba ocilumba cove cekandu locilumba cove coku pia elisi. Likutilila ove muẽle kuenda omanu oku tuvika akandu ene. Nenavo ocilumba comanu oku va likutilila. Ndeci Yehova a sapula haico o linga.

⁸ Arone yu wa amela kutala, wa ipãla onale yocilumba cekandu liaye.

⁹ Oco omãla va Arone vo nenela osonde yaco. Eye wa yava omuine waye vosonde, wa yi kapa kolombinga vitutale, wa peselela osonde posi konele yutala.

¹⁰ Puãi ulela kuenda olongela loluleki lu sungue komuma via tunda kocilumba cekandu wa vi yokela kutala. Ndeci Yehova a sapuila Mose haico Mose a linga.

¹¹ Ositu locipa caco wa vi yoka vondalu keyala liocilombo, kofeka.

¹² Oco a ipa ocilumba coku pia elisi. Kuenje omãla va Arone vo nenẽla osonde. Arone wa yi nyila kutala kolonẽle viosi.

¹³ Vo wiha ocilumba coku pia elisi, ocinumba ocinumba kuenda utue waco, kuenje wa vi yokela kutala.

¹⁴ Oco wa sukula ovãla kuenda ikalo lovoko ha vi yokela kutala kilu liocilumba coku pia elisi.

¹⁵ Kuenje wa nena ocilumba comanu, Wa nyañula ocitupi cohombo cocilumba cekandu liomanu. Wa cipa ha ci lumbila ekandu, ndeci ocilumba catete cekandu.

¹⁶ Yu wa nena ocilumba coku pia elisi, wa ci lumba ndocihõlo caco.

¹⁷ Oco wa nena ocilumba cosema, wopako epupu, wa yi yokela kutala kumuamue losema yocilumba comẽle coku pia elisi.

¹⁸ Yu wa ipavo ongombe locitupi comeme, ocitundasonde combembua comanu. Omãla va Arone vo nenela osonde yaco, kuenje wa yi nyĩla kutala kolonele viosi.

¹⁹ Vo nenelavo ulela wongombe lu wocitupi, lucĩla wa lẽla, lu wa wuvika kovãla, lolongẽla, loluleki lu sungue komuma.

²⁰ Kuenje va kapa ulela kilu liolonete, yu wa yokela ulela waco kilu liutala.

²¹ Oco olonete kuenda ocikalo caco condio Arone wa vi yangelisa ndocilumba coku yangela kovaso a Yehova. Ndeci Mose a sapula haico Arone a linga.

²² Oco Arone oku tulikila komanu ovaka aye wa va sumũluisa. Yu wa loka oku a kala loku lumbila ocilumba cekandu locilumba coku pia elisi lovilumba viombembua.

²³ Mose la Arone va iñila vombalaka yoku ñualehela la Yehova. Eci va tundamo va sumũluĩsa omanu kuenje ulamba wa Yehova wa mõlẽhela komanu vosi.

²⁴ Kuenje kovaso a Yehova kua tunda ondalu, yu ya lia ocilumba coku pia elisi lulela kilu liutala. Eci omanu vosi va ci mõla va kaluka, va lituvika ovipala viavo posi.