OVISILA 8 - Embimbiliya - Bíblia Sagrada em Umbundu

¹ Yehova wa popia la Mose hati,

² Tambula Arone lomãla vaye valume kumue laye, luwalo waco kuenda ulela woku waveka, lonui yocilumba cekandu kuenda ovitupi viaco vivali, luhamba wolombolo ka vi kuete etumbisa.

³ Ongoluila omanu vosi kuvelo wombalaka yoku ñualehela la Yehova o sapuila. Omanu vongolokela puvelo wombalaka yoku ñualehela la Yehova.

⁴ Oco Mose yu wa linga ndeci Yehova o sapuila. Omanu vongolokela puvelo wombalaka yoku ñualehela la Yehova.

⁵ Oco Mose wa popia lomanu hati, Eci ndinga ndeti Yehova a handeleka oku ci linga.

⁶ Oco Mose wa nena Arone lomãla vaye valume, wa va sukula lovava.

⁷ Kuenje wo walisa ocikutu, wo witika uvia, wo walisa esanya, wo kapa efonde, wo witikisa luvia wefonde wa vindiwa luloño, wo li pandekela.

⁸ Oco wo kapa onjeke yoponete; vonjeke yaco yoponete wa kapa Urimi la Tumimi.

⁹ Kuenje wo kapa ekofue kutue waye, lo kekofue kovaso yaco oco wa kapako ulame wulu, ekolowa li kola. Ndeci Yehova a sapuila Mose haico Mose a linga.

¹⁰ Mose wa nyañula ulela woku waveka, wa waveka otavernakulu kuenda viosi via kalamo hã ha vi kolisa.

¹¹ Wo nyila kutala olonjanja epanduvali, wa waveka utala kuenda ovikuata viawo viosi, kuenda etasu lomangu yaco ha vi kolisa.

¹² Wa itila kutue wa Arone ulela woku waveka, wo waveka ho kolisa.

¹³ Mose wa nena omãla va Arone valume ha va walisa ovikutu. Wa va itikisa ovivia. Wa va futisa ovifuto. Ndeci Yehova a sapuila Mose haico Mose a linga.

¹⁴ Oco wa nena onale yocilumba cekandu kuenje Arone lomãla vaye va imbila ovaka avo kutue wonale yocilumba cekandu.

¹⁵ Kuenje Mose wa yipa. Oco Mose wa nyañula osonde yaco, wa yi kapa lomuine kolombinga viutala kolonele viosi. Wa yelisa utala, wa peselela osonde posi konẽle yutala okuti wo kolisa loku u wupa eviho liawo.

¹⁶ Wa nyañula ulela wa kala kovãla kuenda oluleki lu sungue komuma lolongela vivali lulela wavio, kuenje Mose wa vi yokela kutala.

¹⁷ Onale yaco puãi kuenda ocipa caco lositu laniña wa vi yoka londalu keyala liocilombo, kofeka. Ndeci Yehova a sapuila Mose haico Mose a linga.

¹⁸ Yu wa nena ocitupi cocilumba coku pia elisi, kuenje Arone lomãla vaye va imbila ovaka avo kutue wocitupi caco.

¹⁹ Mose wa cipa kuenje wa nyĩla osonde yaco kutala kolonele viosi.

²⁰ Yu wa sasa ocitupi caco kuenje Mose wa yoka utue waco limãlo lulela.

²¹ Yu wa sukula lovava ovãla kuenda ikalo lovoko aco kuenje Mose wa yokela ocitupi cosi kutala. Oco ocilumba coku pia elisi celemba li pepa okuti ocilumba covondalu coku Yehova. Ndeci Yehova a sapuila Mose haico Mose a linga.

²² Kuenje wa nena ocitupi cikuavo, ocitupi cocikundi, oco Arone lomãla vaye va kapa ovaka avo kutue wocitupi caco.

²³ Mose yu wa cipa, kuenje wa nyañula kamue kosonde yaco, wa ka kapa kosungu yetui lia Arone liondio, kuenda komumba yeka liaye liondio, lokomumba yomai yaye yondio.

²⁴ Mose wa nena omãla va Arone kuenje wa kapa okasonde kolosungu viovatui avo olondio, lo kolomumba viovaka avo olondio, lo kolomumba violomai viavo violondio. Mose wa nyĩla osonde yaco kutala kolonele viosi.

²⁵ Wa nyañula ulela waco, lucila wa neta lulela wosi wa kala kovãla, loluleki lu sungue komuma, lolongela viaco vivali lulela wavio, locikalo condio.

²⁶ Kuenda kuhamba wolombolo ka vi kuete etumbisa wa kala kovaso a Yehova, wopako ekende limuamue ka li kuete etumbisa, lekende limue lia tengiwa lulela, kuenda ekende limue lia pelevala, yu wa vi kapa kilu liulela lo kilu liocikalo condio.

²⁷ Wa vi kapa viosi povaka a Arone lo povaka omãla vaye, wa vi yangelisa ndocilumba coku yangela kovaso a Yehova.

²⁸ Mose wa vi upa povaka avo, wa vi yokela kutala kilu liocilumba coku pia elisi. Ovio viocikundi, vielemba li pepa; oco ocilumba covondalu coku Yehova.

²⁹ Mose wa nyañula onete, wa yi yangelisa ndocilumba coku yangela kovaso a Yehova. Ya kala ocikepa ca Mose cocitupi cocikundi. Ndeci Yehova a sapuila Mose haico Mose a linga.

³⁰ Oco Mose wa nyañula okolela koku waveka, lokasonde ka kala kutala wa ka nyila Arone luwalo waye, lomãla vaye, luwalo womãla vaye kumuamue laye, yu wa kolisa Arone, luwalo waye, lomãla vaye, luwalo womãla vaye kumuamue laye.

³¹ Mose wa popia la Arone lomãla vaye hati, Telekeli ositu yaco puvelo wombalaka yoku ñualehela la Yehova, haiko wu yi lili lombolo yi kasi vuhamba wocikundi, ndomo nda sapula siti, Arone lomãla vaye valume va yi lie.

³² Eci ci supapo cositu yaco lombolo yaco wu ci yoka londalu.

³³ Oloneke epanduvali ka ci tava oku tundila kuvelo wombalaka yoku ñualehela la Yehova, te oloneke viocikundi cene via pita. Momo Yehova u wihi ocikundi oloneke epanduvali.

³⁴ Ndeci ca lingiwa etaili haico Yehova a handeleka oku linga, oku tuvika akandu ene.

³⁵ Kuvelo wombalaka yoku ñualehela la Yehova haiko wu kala utanya luteke oloneke epanduvali ho patekeli ocikundi ca Yehova, oco ko fi momo oco ca handelekiwa.

³⁶ Arone lomãla vaye va linga viosi Yehova a va handeleka lomẽla wa Mose.