OVISILA 7 - Embimbiliya - Bíblia Sagrada em Umbundu

¹ Ocilumba ceko ci kola ci mue. Ocihandeleko caco ceci:

² Oku va ipalela ocilumba coku pia elisi haikovo va ipalela ocilumba ceko, oco va nyila osonde yaco kutala kolonele viosi.

³ Kuenje o lumba ulela waco wosi: ucĩla wa lẽla, lulela wa wuvika kovala,

⁴ lolongela vivali lulela wavio u kasi kociwuta, loluleki lu sungue komuma kumue lolongela, viosi o vi upapo.

⁵ Kuenje ocitunda ci vi yokela kilu liutala, ocilumba covondalu ku Yehova. Oco ocilumba ceko.

⁶ Alume vosi pokati kovitunda va lialieko. Ci liwile oko ku kola; ci kola cimue.

⁷ Ndeci ci kasi ocilumba cekandu haico locilumba ceko, ocihandeleko cavio cimuamue. Vi linga viocitunda ci likutilila oku tuvika laco akandu.

⁸ Kuenje ocitunda ci lumbila omunu ocilumba coku pia elisi, ocipa cocilumba a lumba ci kala caye.

⁹ Kuenda ovilumba viosi violomema via yokiwa vofolono, kuenda evi viosi via kangiwa pociyo pamue pelonga vi linga viocitunda ca ci lumba.

¹⁰ Kuenda ovilumba viosi violomema via tengiwa lulela, pamue evi via kukuta, vi tiama komãla valume vosi va Arone, va vi liamuile.

¹¹ Kuenje ocihandeleko cocitundasonde combembua omunu a lumba ku Yehova ceci:

¹² Nda o nena coku panduila a lumbe locitundasonde colupandu otumbolo ka tu kuete etumbisa, tua tengiwa lulela, lotuakende tua pelevala va tu waveka lulela, lotumbolo tua tengiwa lulela, otuo tuosema ya fina ye yukila ulela.

¹³ Oku vokiya kotumbolo tuaco o nena ocilumba colombolo vi kuete etumbisa, kumuamue locitundasonde caye combembua oco colupandu.

¹⁴ Oco o lumbila kamue kocilumba kamue kocilumba, tu linga ocilumba coku tulika ku Yehova. Vikuavo vi tiamẽla kocitunda ci nyila osonde yovilumba viombembua.

¹⁵ Oco ositu yocitundasonde caye combembua haico colupandu yi liwa eteke va ci lumba; ka ci tava oku sia yimue toke komẽle.

¹⁶ Puãi nda ocitundasonde a lumba ci linga cohuminyo pamue ocilumba cocipango, ositu yaco yi liwa eteke a lumba ocitundasonde caye; hẽla liaco eci ca sialapo ci liwa.

¹⁷ Puãi ositu yocitundasonde yina yi selekiwa toke keteke liatatu yi yokiwa londalu.

¹⁸ Nda cimue cositu yocitundasonde caye combembua ci liwa keteke liatatu, ka ci tendelua u wa ci nena. Ci linga onyanya; u o liako enda longole.

¹⁹ Kuenje ositu yi lamba cimue ci vĩhĩsa ka yi liwa, yi yokiwa londalu. Vosi va yela va tela oku lia ositu.

²⁰ Omunu o lia kositu yocitundasonde combembua, haico ca Yehova, haeye o kasi leci co vĩhĩsa, omunu waco o tepiwa ku vakuavo.

²¹ Kuenda eci omunu a lamba cimue ca vĩha, nda comunu ci vĩhĩsa, nda cocinyama ci vĩhĩsa, pamue eci cumbondo wosi ci vĩhĩsa, hã ha li kositu yocitundasonde combembua, haico ca Yehova, omunu waco o tepiwa ku vakuavo.

²² Yehova yu wa popia la Mose hati,

²³ Sapuila va Isareli huti, Ka ci tava oku lia ulela wongombe, ndaño u womeme pamue wohombo.

²⁴ Kuenje ulela wocinyama ca lifila, lulela weci ca kuatiwa locinyama, va linga lawo cimue ciñi puãi oku u lia ka ci tava.

²⁵ Momo u o lia ulela wocinyama omanu va nena ndocilumba covondalu ku Yehova, o tepiwa ku vakuavo.

²⁶ Ka ci tava oku lia osonde, ndaño eyi yonjila ndaño eyi yocinyama, volonjo viene.

²⁷ Omunu wosi o lia osonde o tepiwa ku vakuavo.

²⁸ Yehova yu wa popia la Mose hati,

²⁹ Sapuila va Isareli huti, Wosi o nena ku Yehova ocitundasonde combembua a nene ku Yehova ocilumba caye ci tunda kocitundasonde caye combembua.

³⁰ Lovaka aye muẽle a nene ovilumba via Yehova viovondalu. O nena ulela lonete yaco. Va yangelisa onete ndocilumba coku yangela kovaso a Yehova.

³¹ Ocitunda ci yoka ulela waco kilu liutala, onene puãi oyo ya Arone lomãla vaye valume.

³² Weci kocitunda ocikalo condio ndocilumba ci tunda kovitundasonde viene viombembua.

³³ U pokati komãla va Arone o lumba osonde yovilumba viombembua kuenda ulela, ocikalo condio oco ocikepa caye.

³⁴ Momo onete yoku yangela locikalo coku tulika nda onete yoku yangela locikalo coku tulika nda vi upa kovitundasonde viombembua via va Isareli, nda vi eca ku Arone, eye ocitunda, lokomãla vaye ndovikepa viavo oloneke viosi, vi tunda ku va Isareli.

³⁵ Ovio ovikepa vioku wavekiwa via Arone levi viomãla vaye viovilumba via Yehova viovondalu, eteke va va lekisa ha va vumbi Yehova komangu yutunda.

³⁶ Ovio Yehova a handeleka okuti vi eciwa kokuavo la va Isareli eteke va va waveka. Ovio ovikepa viavo vi enda hũ kovitumbulukila viavo viosi.

³⁷ Oco ocihandeleko cocilumba colomema, leci cocilumba cekandu, leci cocilumba ceko, leci coku iha ocikundi, leci cocitundasonde combembua.

³⁸ Evi ovio Yehova a handeleka Mose komunda ya Sinai, eteke a handeleka va Isareli ovo ha va nena ovilumba viavo ku Yehova, kekalasoko lia Sinai.