OVISILA 6 - Embimbiliya - Bíblia Sagrada em Umbundu

¹ Yehova wa popia la Mose hati,

² Nda omunu umue o lueya ha lingila Yehova ekandu poku kembela ukuavo cimue a pindikisa, pamue cimue conjeke, pamue coku iva, pamue wa lingisa ukuavo cĩvi,

³ pamue wa alula cimue ca nyelile, ya wa ci kembela ha lisingi luhembi; vovina evi viosi omanu va lingainga loku lueyamo,

⁴ eci umue a vi lueya, kuenje a kuete eko, oco o tiula caco eci a ivile pamue ceci a mõla loku lingisa cĩvi, pamue ceci va pindikisile, pamue ceci va nyelisile eye yu wa ci alula,

⁵ ndaño ceci a ci lisingila luhembi. O ci tiula cosi, kuenje o vandekako onepa yatãlo; o ceca ku muẽle yaco eteke vo wasa eko.

⁶ Kuenje o nena kocitunda ocilumba caye ceko coku Yehova, omanga yokocunda ka yi kuete etondelo, ndeci ove o sokiya; oco ocilumba ceko.

⁷ Noke ocitunda cu likutilila ku Yehova oku tuvika ekandu, kuenje ecelua cosi a linga co muisa eko.

⁸ Yehova wa popia la Mose hati,

⁹ Sapuila Arone lomãla vaye huti, Ocihandeleko cokocilumba coku pia elisi ceci: Ocilumba coku pia elisi ci kala kilu liolohui kutala uteke wosi toke omele, kuenda ondalu yokutala yi taima ño-o,

¹⁰ locitunda ci wala ocikutu caye covalatanya. Ovikasau viaye viovalatanya ci vi kapa ketimba liaye, kuenje ci yuka etiko liocilumba coku pia elisi eci ca liwa londalu kutala, ci li kapa konẽle yutala.

¹¹ Oco ci lula uwalo waye, ci wala uwalo ukuavo, ci tuala etiko liaco keyala, kofeka.

¹² Ondalu yokutala yi taima ño, ka yimi; kuenje ocitunda ci sokekapo olohui omẽle komẽle, ci kapapo ciwa ocilumba coku pia elisi, ci yokapo ulela wovilumba viombembua.

¹³ Va taimise ño hũ ondalu yi taima ño hu, ka yimi.

¹⁴ Ocihandeleko cocilumba colomema ceci: Omãla va Arone va ci nena ku Yehova, kovaso yutala.

¹⁵ Umue o yoyako epupu kosema yaco ya fina yocilumba colomema kuenda kulela waco linsensu viaco viosi vi li kocilumba colomema, o vi yokela kutala ndonjivaluiso yaco, ndelemba li pepa ku Yehova.

¹⁶ Kuenje caco ca supapo Arone lomãla vaye va ci lia. Ka ci kala letumbisa. Ci liwila apa pa kola; kocitali combalaka yoku ñualehela la Yehova oko va ci lila.

¹⁷ Ka ci yokiwa letumbisa. Nda ceca ndonepa yavo yovilumba viange viovondalu; ci kola ca piãla, ndocilumba cekandu kuenda ndocilumba ceko.

¹⁸ Alume vosi pokati komãla va Arone va tẽla oku ci lia ndocisila cavo oloneke ka vi pui kovitumbulukila viene, covilumba via Yehova viovondalu. U o vi lamba o kolisua.

¹⁹ Yehova wa popia la Mose hati,

²⁰ Ocilumba ca Arone lomãla vaye va ci lumbila ku Yehova eteke vo waveka, ceci: Onepa yekui yefa liosema ya fina. Va ci nena nena ndocilumba colomema, omeyu omẽle, omeyu oñolosi.

²¹ Ci kangiwa lulela velonga. Vu ci nena tupu ca tengiwa ciwa. Ci tepiwa ovinimbu ndocilumba colomema. Vu ci lumba ndelemba li pepa ku Yehova.

²² Ocitunda ci wavekiwa pokati komãla va Arone oku u piñala, ci lumba lumba ku Yehova ndeci ca tukuiwa. Locilumba cosi ci yokiwa ño hũ.

²³ Ovilumba viosi violomema viovitunda vi yokiwa pe, ka vi liwa.

²⁴ Yehova wa popia la Mose hati,

²⁵ Sapuila Arone lomãla vaye, huti, Ocihandeleko cocilumba cekandu ceci: Oko va ipalela ocilumba coku pia elisi haiko va ipalela ocilumba cekandu kovaso a Yehova; oco ci kola cimue.

²⁶ Ocitunda ci ci lumbila ekandu oco ci ci lia. Ci liwile oko ku kola, kocitali combalaka yoku ñualehela la Yehova.

²⁷ Cosi ci lamba kositu yaco ci kolisua. Nda uwalo umue u samũhilua losonde yaco, waco wa samuhĩlua u sukuila omu mu kola.

²⁸ Nda omu va yi teleka ombia yotuma ombia yaco va yipaya. Nda va yi telekele vombia yosipi ombia yaco va yi kunga loku pitisamo ovava.

²⁹ Alume vosi pokati kovitunda va lialie ño; yi kola cimue.

³⁰ Puãi ka ci tava oku lia cimue cocilumba cekandu nda va nena ale osonde yaco vombalaka yoku ñualehela la Yehova, ha va likutilila oku tuvika layo omu mu kola. Ci yokiwe londalu.