OVISILA 5 - Embimbiliya - Bíblia Sagrada em Umbundu

¹ Nda omunu o lueya omo a yeva ondaka yoku lisinga londuko ya Suku, haeye wa kala ombangi ya ci mõla pamue ya ci kulĩha puãi ka ci sapuile, omunu waco o sanga ongole.

² Pamue nda umue o lamba cimue ca vĩha, ci kale ocife cocinyama ci vĩhĩsa, pamue ci kale ocife capuka a vĩhĩsua, oco o kasi leko.

³ Pamue nda o lamba cimue comunu ci vĩhĩsa, evĩho liaco lio vĩhĩsa nda lie nda lie, kuenje haimo eye o kasi lonumbi yaco, eci a ci limbuka oco o kala leko.

⁴ Pamue nda omunu lomẽla waye o lisinga lonjanga oku linga cimue cĩvi, ndaño oku linga ciwa; ci kale nye la nye omunu o popia lonjanga oku lisinga, yu ka co lombolokele, eteke a ci limbuka o kala leko liocina caco.

⁵ Kuenje ci kala ndomo: eci a kasi leko liocina cimue cevi, o litavela ocina a lueya,

⁶ kuenje o nena ku Yehova ocilumba caye ceko omo a linga ekandu. Ocilumba caco ci kale omange yokocunda, okameme pamue ohombo, ndocilumba cekandu. Noke ocitunda cu likutilila ha ci tuvika ekandu liaye.

⁷ Puãi nda ka tẽla oku landa okameme, o nena ku Yehova, ndocilumba ceko liaye, olopomba vivali pamue ivuvu vivali violonende, omo wa linga ekandu; eyi ocilumba cekandu, eyi ocilumba coku pia elisi.

⁸ O vi nena kocitunda. Ocitunda ci lumba tete eyi yocilumba cekandu, ci soyola utue waco kosingo puãi ka ka ci tete pokati.

⁹ Ci nyĩla kamue kosonde yocilumba cekandu konele yutala. Osonde ya supapo ci yi peselela posi konele yutala; oco ocilumba cekandu.

¹⁰ Ci lumba yikuavo ndocilumba coku pia elisi, ndocihõlo caco. Noke ocitunda cu likutilila ha tuvika ekandu liaye a linga kuenje ecelua.

¹¹ Puãi nda eci a kuete ka ci tẽla olopomba vivali pamue ivuvu vivali violonende, o nena ndocilumba cekandu a linga, onepa yekui yefa liosema ya fina. Ka kapipo ulela, ndaño insensu ka kapipo, momo oco ocilumba cekandu.

¹² O yi nena kocitunda, kuenje ocitunda ci yoyako epupu liaye ndonjivaluiso yaco, ci yi yokela kutala kilu liovilumba via Yehova viovondalu. Oco ocilumba cekandu.

¹³ Noke ocitunda cu likutilila oku tuvika ekandu a lingile kovina viaco, kuenje ecelua. Ocisupe caco ci kala cocitunda cocilumba colomema.

¹⁴ Yehova wa popia la Mose hati,

¹⁵ Nda omunu umue o linga ahuku ha lueya lonumbi kovina vi kola via Yehova, o nena ku Yehova ndocilumba ceko liaye omanga yokocunda ka yi kuete etondelo, ndeci ove o sokiya lolosiekele viopalata, ndosiekele yonembele; oco ocilumba ceko.

¹⁶ Omo a linga ahuku oku sama eci ci kola o feta. O vandekako onepa yatãlo ha yeci kocitunda. Noke ocitunda cu likutilila lomanga yocilumba ceko oku ima ekandu, kuenje ecelua.

¹⁷ Nda omunu umue o lueya loku linga cimue covina Yehova a handeleka hati, Ka vi ka lingiwe, ndaño ka ci kũlĩhĩle haimo o kasi leko, o kala muẽle longole yaye.

¹⁸ O nena kocitunda omanga yokocunda ka yi kuete etondelo, ndeci ño ove o sokiya, ndocilumba ceko. Noke ocitunda cu likutilila ha tuvika eci a ci lueya lonumbi, ka ci limbukile, kuenje ecelua.

¹⁹ Oco ocilumba ceko. Ocili muẽle, eye o kasi leko kovaso a Yehova.