OVISILA 4 - Embimbiliya - Bíblia Sagrada em Umbundu

¹ Yehova wa popia la Mose hati,

² Popia la va Isareli, huti, Nda umue o lueya lonumbi kovina viaco Yehova a handeleka hati, Ka vi ka lingiwe, eye puãi wa sama cimue pokati kavio;

³ nda ocitunda ca wavekiwa ca lueya hã ha ci kokela ongole kofeka, oco, omo a linga ekandu, o tuala ku Yehova onale yongombe ka yi kuete etondelo. Yi linga ocilumba cekandu.

⁴ O nena onale yaco kuvelo wombalaka yoku ñualehela la Yehova ha yeci ku Yehova. O kape eka liaye kutue wonale. Ipãlela Yehova onale yaco.

⁵ Kuenje ocitunda ca wavekiwa ci nyañula kamue kosonde yonale, ci yi nena kombalaka yoku ñualehela la Yehova.

⁶ Oco ocitunda ci yava omuine waye vosonde, kuenje ci nyĩla osonde yaco olonjanja epanduvali kovaso a Yehova kovaso yongumbo yohondo yi kola.

⁷ Kuenje ocitunda ci kapa kamue kosonde yaco kolombinga viutala winsensu vi pepa kovaso a Yehova, owo u kasi vombalaka yoku ñualehela la Yehova. Osonde yaco yosi yonale ci yi peselela posi konẽle yutala wocilumba coku pia elisi u kasi puvelo wombalaka yoku ñualehela la Yehova.

⁸ Oco ulela wosi wonale yocilumba cekandu ci wupako. Ulela wa wuvika kovãla, lulela wosi u kasi kovãla,

⁹ lolongẽla vivali lulela wavio u kasi kociwuta, loluleki lu sungue komuma kumue lolongẽla viosi, o vi upako,

¹⁰ ndeci va vi upopa kongombe yocitundasonde combembua. Kuenje ocitunda ci vi yokela kutala wocilumba coku pia elisi.

¹¹ Ocipa conale yaco, kuenda ositu yaco yosi lutue likalo lovoko kuenda ovãla laniña,

¹² okuti onale yaco yosi, o yi tuala keyala, kofeka, kumue ku yela, o yi yokela kilu liolohui londalu. Va yi yokela keyala.

¹³ Nda owiñi wosi wa va Isareli wa lueya lonumbi, locina caco ca vembikiwa lowiñi, kuenda va sama cimue covina viaco Yehova a handeleka hati, Ka vi ka lingiwe, okuti owiñi wa pia eko;

¹⁴ eci ekandu va linga li limbukiwa oco owiñi waco u tuala onale yongombe ndocilumba cekandu, u yi nena kovaso yombalaka yoku ñualehela la Yehova.

¹⁵ Kuenje akulu pokati kowiñi va kapa ovaka avo kutue wonale yaco kovaso a Yehova. Va ipalela onale kovaso a Yehova.

¹⁶ Ocitunda ca wavekiwa ci nena kamue kosonde yonale kombalaka yoku ñualehela la Yehova.

¹⁷ Ocitunda ci yava omuine waye vosonde, ci yi nyĩla olonjanja epanduvali kovaso a Yehova, kovaso yongumbo.

¹⁸ Noke ci kapa kamue kosonde yaco kolombinga viutala u kasi kovaso a Yehova vombalaka yoku ñualehela la Yehova. Osonde ya sialapo ci yi peselela posi konẽle yutala wocilumba coku pia elisi, u kasi puvelo wombalaka yoku ñualehela la Yehova.

¹⁹ Kuenje ulela waco wosi ci wupapo, cu yokela kutala.

²⁰ Oco ocitunda ci linga lonale yaco. Ndeci ca linga lonale yocilumba cekandu haico a linga leyi. Noke ocitunda ci va likutilila oku tuvika ekandu kuenje va ecelua.

²¹ Oco ocitunda ci tuala onale yaco kofeka ha ci yoka ndeci a yokele onale yatete. Oco ocilumba cekandu liowiñi.

²² Ombiali eci yi lueya kuenje yi sama lonumbi cimue covina viaco viosi Yehova Suku yaye a handeleka hati, Ka vi ka lingiwe, kuenje yi kasi leko,

²³ nda ekandu liaye a linga lio lomboloka, o nena ocilumba caye cohombo, ocitupi ka ci kuete etondelo.

²⁴ Oco o kapa eka liaye kutue wohombo yaco. O yipalela oko va ipalaila ocilumba coku pia elisi kovaso a Yehova; oco ocilumba cekandu.

²⁵ Ocitunda ci nyañula okasonde kocilumba cekandu lomuine waye, ci yi kapa kolombinga viutala wocilumba coku pia elisi. Osonde yaco ci yi peselela posi konele yutala wocilumba coku pia elisi.

²⁶ Oco ulela waco wosi cu yokela kutala, ndeci ño ulela wocitundasonde combembua. Noke ocitunda cu likutilila ha tuvika ekandu liaye, kuenje ecelua.

²⁷ Omunu waño nda o lueya lonumbi kuenje o sama cimue covina viaco Yehova a handeleka hati, Ka vi ka lingiwe, kuenje o kasi leko,

²⁸ ekandu liaye a linga, nda wa li limbuka, o nena ohombo ndocilumba caye, omange ka yi kuete etondelo, o yi nena omo a linga ekandu.

²⁹ O kapa eka liaye kutue wocilumba cekandu, kuenda ipalela ocilumba cekandu komangu yocilumba coku pia elisi.

³⁰ Ocitunda ci nyañula okasonde kaco lomuine waye, ci ka kapa kolombinga viutala wocilumba coku pia elisi. Osonde yaco yosi ci yi peselela posi konele yutala.

³¹ Ulela waco wosi ci wupapo, ndeci va upopa ulela kocitundasonde combembua. Ocitunda cu yokela kutala ndelemba li pepa ku Yehova. Noke ocitunda cu likutilila oku tuvika ekandu, kuenje ecelua.

³² Nda o nena okameme ndocilumba caye cekandu, o nena omange ka yi kuete etondelo.

³³ O kapa eka liaye kutue wocilumba caco cekandu, o yipalela ndocilumba cekandu oku va ipãlaila ocilumba coku pia elisi.

³⁴ Ocitunda ci nyañula kamue kosonde yocilumba cekandu lomuine waye, ci ka kapa kolombinga viutala wocilumba coku pia elisi. Osonde yaco yosi ci yi peselela posi konele yutala.

³⁵ Oco ulela waco wosi ci wupapo ndeci vopopapo ulela wokameme kocitundasonde combembua. Oco ocitunda cu yokela kutala ndovilumba via Yehova viovondalu. Noke ocitunda cu likutilila ha tuvika ekandu liaye a linga, kuenje ecelua.