OVISILA 3 - Embimbiliya - Bíblia Sagrada em Umbundu

¹ Oco nda ocilumba caye ocilumba cocitundasonde combembua, o nena ongombe. Yi kale onale pamue omange, o nena ku Yehova eyi ka yi kuete etondelo.

² O kapa eka liaye kutue wocilumba caye, o ci ipailela puvelo wombalaka yoku ñualehela la Yehova. Oco omãla vocitunda Arone va nyila osonde kutala kolonele viosi.

³ O lumbila evi viocitundasonde combembua, ocilumba covondalu coku Yehova. Ulela wa wuvika kovãla, ulela wosi u kasi kovãla,

⁴ lolongela vivali lulela u kasiko, u kasi kociwuta, loluleki lu sungue komuma kumue lolongela, o vi upako.

⁵ Kuenje omãla va Arone va vi yokela kutala kilu liocilumba coku pia elisi ci li kolohui vi kasi kondalu. Oco ocilumba covondalu celemba li pepa ku Yehova.

⁶ Ocilumba caye cocitundasonde combembua coku Yehova nda cocunda colomeme, ci kale ocitupi, pamue omange. O nena eyi ka yi kuete etondelo.

⁷ Nda o nena okameme ndocilumba caye, o ka nena ku Yehova.

⁸ O kape eka liave kutue wocilumba caye, o ci ipailela ocipepi lombalaka yoku ñualehela la Yehova kuenje omãla va Arone va nyila osonde yaco kutala omãla va Arone va nyila osonde yaco kutala kolonele viosi.

⁹ O lumbila evi viocitundasonde combembua, ocilumba covondalu coku Yehova. Ulela waco lucĩla wa lẽla wosi o wupa koluongo, lulela wa wuvika kovãla, lulela wosi u kasi kovãla,

¹⁰ lolongẽla vivali lulela wavio u kasi kociwuta, loluleki lu sungue komuma kumue lolongẽla, o vi upako.

¹¹ Oco ocitunda ci vi yokela kutala. Oco ci linga okulia kuocilumba covondalu coku Yehova.

¹² Ocilumba caye nda cohombo o yi nena ku Yehova.

¹³ O kapa eka liaye kutue wayo. O yi ipailela ocipepi lombalaka yoku ñualehela la Yehova. Omãla va Arone va nyĩla osonde yaco kutala kolonẽle viosi.

¹⁴ Oco, muẽle o lumbila ocitundasonde caco ocilumba caye, ndokuti ocilumba covondalu coku Yehova. Ulela wa wuvika kovãla, lulela wosi u kasi kovãla,

¹⁵ lolongẽla vivali lulela wavio u kasi kociwuta, loluleki lu sungue komuma kumue lolongẽla, o vi upako.

¹⁶ Ocitunda ci vi yokela kutãla. Oco okulia kuocilumba covondalu, celemba li pepa. Ulela waco wosi wa Yehova.

¹⁷ Ci kala ocisila ka ci pui covitumbulukila viene vi enda hũ vovitungilo viene viosi, okuti ka vu li ulela ndaño osonde.