OVISILA 26 - Embimbiliya - Bíblia Sagrada em Umbundu

¹ Ko ka lisongeli iteka. Ko ka litalamisili ociñumañuma ca songiwa, pamue ongunji yoku fendela. Ko ka tumbiki ociteka cewe vofeka yene ho ci fendela, omo ame ndi Yehova Suku yene.

² Lavi asambata ange kuenda oku sumbila ocitumãlo cange ci kola. Ame ndi Yehova.

³ Nda wendaendi lovisila viange loku patekela ovihandeleko viange ho vi lingaingi,

⁴ oco vondombo ndu wihi ombela kuenje osi yeca ovaima ayo loviti viovovapia vima epako liavio.

⁵ Okusasa ku litokeka lokupia kuayuva, lokupia kuayuva ku litokeka luvo woku kũla. Vu lia, vu kuta okulia kuenje vu tunga vofeka yene loku handa.

⁶ Ngeca ombembua vofeka kuenje vu pekela ño pũ, lomue u saluisi. Ovinyama vi lumana ndi vi puisa vofeka, ndaño osipata ka yi piti vofeka yene.

⁷ Vu lupuisa ovanyali vene ha va kupukila kovaso ene losipata.

⁸ Oco vatãlo yene va lupuisa ocita, locita cene ci lupuisa ekui liolohũlũkãi; kuenje ovanyãli vene va kupukila kovaso ene losipata.

⁹ Ndu vanji vanji, ndu citaisi, ndu luisi, ndi kolisila kokuene ohuminyo yange.

¹⁰ Vu lialia ohunju ya vonga kuenje vu tundisamo ohunju ho piñainyamo olomema viokaliye.

¹¹ Numbika pokati kene otavernakulu yange oco utima wange ka vu nyehũla.

¹² Mita mita pokati kene si lingi Suku yene, lene vu linga omanu vange.

¹³ Ame ndi Yehova Suku yene, u wo wupi vofeka ye Egito, okuti ko lingi apika vavo. Nda teya olombambo violomi viene, ndo siuhisi ha wendi ciwa.

¹⁴ Puãi nda ko njevi kuenda ko lingaingi ovihandeleko evi viosi;

¹⁵ nda wu nyehũla ovisila viange, nda ovitima viene vi nyehũla oviholo viange, okuti ko lingi ovihandeleko viange viosi, wu nyõla puãi ohuminyo yange;

¹⁶ nda oco vu linga ndinga lene ndeci: ndu saluisi lonũlo lombambi ha vi vuvalisa ovaso, ha vi konyuisa utima. Vu kũla ombuto yene olivova omo ovanyali vene va yi lia.

¹⁷ Ndu felisili ocipala cange kuenje wasiwi kovaso ovanyãli vene. Ava vo suvuki vo viali. Vu tila ño ndaño lomue o kasi oku hangisa.

¹⁸ Nda haimo ko njeveleli olonjanja epanduvali eyambulo liakandu ene.

¹⁹ Nyõla okulituna kunene wene. Ilu liene ndi li lingisa ndutale, losi yene ndosipi.

²⁰ Ongusu yene yo peseka ño, momo osi yene ka yeci ovaima ayo, ndaño oviti viofeka ka vimi epako.

²¹ Oco nda wu tamãlãla lame kuenje ko njeveleli, ndu luisila vali olonjanja epanduvali afengi akandu ene.

²² Numisa pokati kene ocinyama covusenge cu pundi omãla vene, ci nyõla olongombe viene, cu lingisi vañamiñami, kuenje olonjila viene vi wunda.

²³ Nda ko longisiwi lovina evi ho tiami kokuange puãi wu tamãlãli ño lame,

²⁴ oco lamevo namãlãla len. Ndu veti ame muẽle loku luisa olonjanja epanduvali eyambulo liakandu ene.

²⁵ Ndu nenẽli osipata yu vetisi efetuluinyo liohuminyo. Nda wongolokeli vovaimbo ene, numa efengi pokati kene, oco wu pakuilua peka liovanyãli.

²⁶ Eci nyõla ombolo yeteku liene, ekui liakãi va yoka yoka ombolo yeteku liene, ekui liakãi va yoka yoka ombolo yene vofolono yimuamue, va wĩhi vali ombolo yene loku yi pesalisa. Vu lia puãi ko kuta.

²⁷ Nda haimo ko njevi ndaño ovina evi vio sangi puãi wu tamãlali ño lame,

²⁸ oco ndi litamãlãla lene lonyeño, lamevo ndu yambuli loku luisa olonjanja epanduvali eyambulo liakandu ene.

²⁹ Vu lia ositu yatimba omãla vene valume lositu yatimba omãla vene vakãi.

³⁰ Nyõla olonumbuko viene loku timbula oviteka viene viekumbi. Nyinasi ovivimbi viene kilu liatimba oviteka viene kuenje utima wange u vu nyehũla.

³¹ Ndingisa ovaimbo ene alunda. Nyõla ovitumãlo viene vi kola kuenda si tava oku lehũla uwa walemba ene.

³² Oco ndingisa ofeka ekalasoko. Ovanyãli vene va tungamo va yi komõhẽla.

³³ Kuenje ndu sanduili volofeka loku vu polela osipata. Ofeka yene yi linga ekalasoko, lovaimbo ene alunda.

³⁴ Oco ofeka yi sanjukila asambata ayo osimbu yi kasi ndekalasoko lene vu kasi vofeka yovanyãli vene. Oco ofeka yi puyuka, yi sanjukila asambata ayo.

³⁵ Osimbu yi kasi ndekalasoko yi puyuka epuyuko lina ka ya puyukilile kasambata ene eci wa tungimo.

³⁶ Vakuẽle va supapo, ndi va tumisa uhonyohi wovitima viavo volofeka viovanyali vavo, kuenje okuyevala kuemẽla li enda lofela ku va lupuisa. Va tila ndu o tila osipata. Va kupuka eci lomue o va landula.

³⁷ Va likonjuaka huti ño kovaso osipata ndaño lomue o va lupuisa, kuenje ko kala lolohõlo vioku talama kovaso ovanyali vene.

³⁸ Oco wu taka pokati kolofeka, kuenje ofeka yovanyali vene yu li.

³⁹ Vakuẽle va supapo va sengeteta lolohole viavo volofeka viovanyãli vene. Va sengetetavo lolohole via vaisiavo kumosi lavo.

⁴⁰ Puãi nda va litavela olohole viavo lolohole via vaisiavo ndomo va ndueyela loku tamalala lame,

⁴¹ ndokuti lamevo nda tamalala lavo kuenje nda va nena vofeka yovanyãli vavo, oco nda utima wavo, una ka wa yelisiwile, u ketisua kuenje va tava keyambulo liolohole viavo,

⁴² oco njivaluka ohuminyo yange la Yakoba, lohuminyo yange la Isake, lohuminyo yange la Avirahama. Njivalukavo ofeka.

⁴³ Ofekavo yi siwa lavo, oco yi sanjukila asambata ayo osimbu yi kala ekalasoko lovo ka vemo. Ovo kuenje va tava keyambulo liolohole viavo, omo va nyehũla ovihõlo viange, lovitima viavo via nyehũla ovisila viange.

⁴⁴ Haime, ndaño cosi oco, eci va kasi vofeka yovanyãli vavo si va pamũla loku va nyehũla oku va nyõla pe, loku nyõla ohuminyo yange lavo, omo ame ndi Yehova Suku yavo.

⁴⁵ Puãi omo ndi va sole oco njivalukila ocisila nda lisila lolosekulu viavo vina ndopa vofeka ye Egito kovaso olofeka si lingi Suku yavo. Ame ndi Yehova.

⁴⁶ Evi ovio ovisila lovihõlo lovihandeleko Yehova a tukuila pokati kaye la va Isareli vomunda Sinai lomẽla wa Mose.