OVISILA 25 - Embimbiliya - Bíblia Sagrada em Umbundu

¹ Oco Yehova wa popia la Mose komunda Sinai hati,

² Sapuila va Isareli, huti, Eci wiñili vofeka ndu yiha, oco ofeka yi kolisile Yehova esambata.

³ Anyamo epandu o lima epia liove, kuenda o sonjuila ocumbo cove cayuva anyamo epandu loku ungula ovaima aco.

⁴ Puãi vunyamo wepanduvali ku kala esambata liowusa u kola wofeka, esambata lioku Yehova; ku ka lime epia liove, pamue oku sonjuila ocumbo cove cayuva.

⁵ Eci ca litundila kolomema viove ku ka cungule; ayuva oviti viove kua sonjuilile ku ka ungule, u kala unyamo wowusa u kola wofeka.

⁶ Kuenje esambata liofeka liu lingili okulia, ove lupika wove ulume lupika wove ukãi lukuopange wove kuenda ocingendeleyi cove ca tunga love.

⁷ Kuenje cosi ca litundila ci linga okulia kuolongombe viove kuenda ovinyama vi kasi vofeka yove.

⁸ Oco o tenda olosimanu epanduvali vianyamo. Okuti anyamo epanduvali oku a tenda olonjanja epanduvali, okuti kokuove olosimanu epanduvali vianyamo vi linga akui akuãla kanyamo kanyamo ecea.

⁹ Oco o yevalisa kofeka ondaka yinene yenguẽna keteke liekui kosãi yepanduvali. Keteke lioku tuvika akandu vu yevalisa enguẽna vofeka yene yosi.

¹⁰ Wu kolisa unyamo wakui atãlo kuenda vu imbila komanu vaco vosi vofeka oluiya luoku panduluka. Oco vu lingila unyamo wonjolela kuenje vu tiukila omunu omunu kusenge waye kuenda kepata liaye.

¹¹ Unyamo waco wakui atãlo kokuene vosi u kaila unyamo wonjolela. Unyamo waco lomue o lina, lomue ungula eci ca litundila pamue ayuva oviti evi ka via sonjuiwile.

¹² Omo unyamo waco unyamo wonjolela oco kokuene u linga u kola. Vu li ño olomema viaco oku vi upopa kovapia.

¹³ Vunyamo u wonjolela vu tiukila omunu omunu kusenge waye.

¹⁴ Oco nda o landisa cimue kukuẽle pamue oku ci landa peka liukuẽle, ko ka lilingi cĩvi omunu lukuavo.

¹⁵ O landa kukuẽle ndanyamo aco tunde kunyamo wonjolela; ukuẽle layevo o ku landisa ndanyamo oku ungula.

¹⁶ Nda anyamo a linga alua ove o vokiyako kondando yaco, oco nda anyamo a tepuluka o tepulula kondando yaco; omo o kasi oku landisa kokuove ndanyamo oku ungula kuaco.

¹⁷ Oco ko ka lilingi cĩvi omunu lokuavo puãi sumbili Suku yene. Momo ame ndi Yehova Suku yene.

¹⁸ Oco lingi ovisila viange kuenda oku patekela ovihõlo viange ho vi lingaingi, oco wu tunga vofeka loku handa.

¹⁹ Ovisenge vima epako liavio kuenje vu lialia ho kuti, wu tungamo loku handa.

²⁰ Nda vu pula hoti, Tu lia nye kunyamo wepanduvali, omo ka tu limi, ka tu ungula olomema vietu?

²¹ Ame muẽle numa esumũlũho liange ha liu wili kunyamo wepandu, hã ha liu wimisili olomema via soka lanyamo atatu.

²² Kunyamo wecelãla oco wu lima puãi wu lialia kosila yale, toke kunyamo wecea eci olomema viawo via yela oco wu lialia kosila yale.

²³ Usenge ka u ka landisiwe olumue, omo ovisenge viaco viange; momo wu kasi lame ndakombe, ndovingendeleyi.

²⁴ Vofeka yosi yi linga yene ci tava oku yovola ovisenge.

²⁵ Nda ukuẽle o sangiwa lusuke hã ha landisa caye, ngandiaye muẽle eye iya, o yovola eci manjaye a landisile.

²⁶ Oco nda omunu ka kuete u o ci yovola, leye muẽle wa linga ohuasi yu wa sanga eci ca soka loku ci yovola,

²⁷ oco o tenda ondando yanyamo aco, kuenje o tiula ku a ci landele eci ca sialapo, kuenje o tiukila kusenge waye.

²⁸ Puãi nda ka tẽla oku ci yovola, eci ca landiwile ci siale lu wa ci landele toke kunyamo wonjolela; kunyamo wonjolela ci tunda kokuaye kuenje muẽle o tiukila kusenge waye.

²⁹ Oco nda omunu o landisa onjo yi kasi vimbo liovimbaka, ci tava oku yi yovola vokati kunyamo umosi ombulu tunde keteke ya landiwile; unyamo umosi ombulu ci tava oku yi yovola.

³⁰ Nda puãi ka ya yowiwile pokati kunyamo ombulu, onjo yi kasi vimbo liovimbaka yi tiamẽla hũ ku wa yi landa kuenda kovitumbulukila viaye, onjo yaco eyi ka yi tundi kokuaye kunyamo wonjolela.

³¹ Puãi olonjo vi kasi vovaimbo ka a ñualiwile lovimbaka, va vi sokisa lovapia ovusenge, ci tava oku vi yovola kuenje vi eciwa kunyamo wonjolela.

³² Haimo lumue olonjo viovaimbo a tiamẽla ku va Lewi, ci tava okuti va Lewi va vi yovola ño olotembo viosi.

³³ Nda u Lewi ka yovola onjo yaye oco onjo ya landiwa vimbo liaye yi tiukila kokuaye kunyamo wonjolela, omo olonjo viovaimbo a va Lewi vi linga viavo muẽle pokati ka va Isareli.

³⁴ Puãi usenge u wa tiamẽla kovaimbo avo ka u landisiwa; owo wavo wenda ño hũ.

³⁵ Nda ukuẽle wa sangiwa lusuke kuenda o fukĩla, ove u kuatisa; o kala love ndukombe pamue ndocingendeleyi.

³⁶ Ku ka tambule kokuaye osindike pamue ombandeke, puãi sumbila Suku yove oco ukuẽle a tumãle love.

³⁷ Ku ko wĩhe olombongo viove loku lavoka osindike, ndaño oku wĩha okulia kuove ka ka lavoke coku vandeka.

³⁸ Ame ndi Yehova Suku yene ndo wupi vofeka ye Egito okuti ndu wĩhi ofeka ya Kanana hã si lingi Suku yene.

³⁹ Nda ukuẽle wa sangiwa lusuke ha lilandisa kokuove, ku ko lingise ndupika.

⁴⁰ A kale love ndukuopange, ndukombe; a ku vumbile toke kunyamo wonjolela,

⁴¹ oco a ku tunde, leye lomãla vaye, ha tiukila kepata liavo, a tiukila koluse.

⁴² Momo akuenje vange, nda vopa vofeka ye Egito, ka va ka landiwe ndapika.

⁴³ Ku ko viale lukãlu, o sumbila puãi Suku yove.

⁴⁴ Oku limuisa apika vove valume lapika vakãi o kala lavo, ci tava oku landa apika valume lapika vakãi kolofeka vio ñuali.

⁴⁵ Ndaño kovingendeleyi via tunga pokati kene, pamue kapata avo va kasi lene, ava va citiwila vofeka yene, ci tavavo oku landa apika okuti o va fuka.

⁴⁶ Apika vaco ci tava oku va sila omãla vene ndocipiñalo cavo coloneke viosi. Kokuavo oko wu muĩla apika va vumba vumba ño hũ, puãi vamanjene va Isareli ka ci tava oku va viala okuti vu liviala lukãlu.

⁴⁷ Nda ukombe pamue ocingendeleyi o kasi love o linga ohuasi kuenje ukuẽle o lisungue laye o sangiwa lusuke ha lilandisa kukombe pamue kocingendeleyi ci kasi love, ndaño kukuepata liukombe;

⁴⁸ eci a landiwa ci tava oku yovuiwa. Ci tava okuti umue ku vamanjaye u yovola,

⁴⁹ pamue isiaye yumalẽhe pamue omõla a isiaye ci tava oku u yovola, ndaño umue wiñi kepata liavo ositue laye ocili, ci tava oku u yovola; pamue nda wa linga ohuasi ci tava oku liyovola.

⁵⁰ O tenda lu wo landele tunde kunyamo a lilandisile kokuaye toke kunyamo wonjolela: olombongo vioniule yaye vi lisoka lanyamo aco; ci kala laye ca soka ndotembo yukuopange.

⁵¹ Nda kua kamba anyamo a lua oniule yaye yi lisoka lao, yi tepuluiwe kolombongo a landiwile lavio.

⁵² Nda kunyamo wonjolela kuo kamba anyamo ka a luile, o tenda laye, kuenje ca soka lanyamo aye haico a tiula ofeto yeyovo liaye.

⁵³ O kala laye ndukuopange wunyamo kunyamo, ka ko viale kovaso ove lukãlu.

⁵⁴ Oco nda ka yovuiwile vanyamo aco o tunda vunyamo wonjolela, eye muẽle lomala vaye kumuamue laye.

⁵⁵ Omo va Isareli va ndingila akuenje vange; ovo akuenje vange nda vopa vofeka ye Egito. Ame ndi Yehova Suku yene.