OVISILA 24 - Embimbiliya - Bíblia Sagrada em Umbundu

¹ Oco Yehova wa popia la Mose hati,

² Pañinya va Isareli okuti va ku nenela ulela wa fina wa tunda kasetona a sopuiwa. Ulela waco u kapiwe vondiyelo, ondiyelo yaco yi taime ño otembo yosi.

³ Yi kala vombalaka yoku ñualehela la yehova, posamua yongumbo yuvangi. Arone o yi tata tunde koñolosi toke komẽle kovaso a Yehova ha yi taima ño hũ; ci kale ocisila cenda hũ kovitumbulukila viene.

⁴ Arone haeye o sokaiya olovela viondiyelo yulu yi kasi kovaso a Yehova.

⁵ Ovo o nyañula osema ya fina hu yoki layo ekui liakende kakende avali: olonepa vivali viekui viefa vi linga ekende limosi.

⁶ O a tumbika ovilala vivali, kulala epandu, kulala epandu, komesa yulu wa fina kovaso a Yehova.

⁷ O kapa insensu via fina kulala ulala okuti vi kala pamosi lombolo, vi linga onjivaluko kuenje vi lumbiwa ocilumba covondalu ku Yehova.

⁸ Asambata osi o vi tumbaika kovaso a Yehova; ci kala ocisila ka ci pui ca va Isareli.

⁹ Vi tiamẽla ku Arone lomãla vaye valume. Va vi lile kumue ku kola momo viu lingila cimue ci kola enene, ca tunda kovilumba viovondalu via lumbiwa ku Yehova. Vi linga onepa yaye otembo ka yi pui.

¹⁰ Ulume umue, nyõho yaye u Isareli, isiaye u Egito, wa ñuala ñuala pokati ka va Isareli, kuenje ulume waco, nyoho yaye u Isareli, lulume umue u Isareli va liyakela pokati kocilombo.

¹¹ Oco ulume waco, nyõho yaye u Isareli, wa imbula onduko ya yehova, wa siñala muẽle, oco vo nena ku Mose. Inaye onduko yaye Selomiti, haeye omõla a Daviri, ukuepata lia Dani.

¹² Vo kapa vokayike toke va yeva eci ci va sapuila Yehova.

¹³ Yehova yu wa popia la Mose hati,

¹⁴ Upa u wa siñala kocilombo, u tuala kofeka, kuenda ava vosi vo yeva va kape ovaka avo kutue waye kuenje owiñi wosi u sosole lovawe.

¹⁵ Sapuilavo va Isareli huti, Wosi o siñala Suku yaye ambata ekandu liaye.

¹⁶ U imbula onduko ya Yehova ipaiwa muẽle. Omanu vosi vo sosola lovawe. Ci kale ocingendeleyi, ci kale onyitiwe, eci a imbula onduko yaco, ipaiwa.

¹⁷ Kuenda u o ponda omunu o favo.

¹⁸ U ipãla ocinyama o piñainyapo, omuenyo lomuenyo.

¹⁹ Nda omunu o lemẽha ukuavo oco ndeci a linga haico ci lingiwavo laye;

²⁰ oku teka loku teka, iso liso, eyo leyo; ndeci a lemẽha ukuavo haico ci lingiwa laye.

²¹ U wa ipa ocinyama o ci piñainyapo, kuenda u wa ipa omunu ipaiwa.

²² Wu kala locihandeleko cimuamue cocingendeleyi haico conyitiwe, omo ame ndi Yehova Suku yene.

²³ Oco Mose wa ci sapuila va Isareli. Vopa kocilombo u wa siñalẽle vo tuala kofeka kuenje vo sosola lovawe, okuti va Isareli va linga ndeci Yehova a sapuila Mose.